ОХУ-ын ерөнхийлөгч Владимир Путин АНУ-ын шинээр сонгогдсон ерөнхийлөгч Дональд Трампийн тангараг өргөх ёслолын өмнө баяр хүргэж, Цагаан ордны шинэ засаг захиргаатай зөвшилцөөнд хүрэхэд бэлэн байгаагаа илэрхийлжээ. Тодруулбал, Путин "Бид Трампийн дэлхийн гуравдугаар дайнаас урьдчилан сэргийлэх шаардлагатай гэсэн уриалгыг хүлээн авсан. Уг байр суурийг манай орон талархалтайгаар санал нийлж, шинээр сонгогдсон АНУ-ын ерөнхийлөгчид баяр хүргэж байна" гэж Аюулгүйн зөвлөлийн хуралдааны үеэр хэлжээ.

Кремлийн удирдагч АНУ-тай харилцаагаа сэргээх боломжтойг онцлон тэмдэглэж, Трамп болон түүний багийнхантай хэлэлцэхэд бэлэн гэдгээ илэрхийлсэн юм.

Путин хэлэхдээ, "Байдены засаг захиргааны буруугаас манай хоёр орны харилцаа тасарсан. Тиймээс Трампийн баг хамт олонтой харилцаагаа сэргээх нь хоёр орны чин хүсэл" гэж мэдэгдсэн байна. Кремлийн өндөр албан тушаалтнууд мөн адил Москва хэзээ ч хэлэлцээнээс татгалзаж байгаагүйг онцолж, АНУ-ын аль ч засаг захиргаатай хамтран ажиллахад бэлэн хэвээр байгааг сэтгүүлчдэд хэлсэн аж.

Өнгөрсөн оны арваннэгдүгээр сард Трамп сонгуульд ялалт байгуулсны дараа Путин баяр хүргэхээс татгалзаж байв. Мөн АНУ-ыг Орост найрсаг бус гэж тодорхойлж байсан удаатай. Гэсэн хэдий ч Путины санаа бодол өөрчлөгдсөн гэдгийг энэ удаагийн мэдэгдлээс олон нийт мэдэж авчээ. Улмаар Трампийн засаг захиргааны үед Орос, Украины дайн дуусна гэх итгэл найдварыг нэмэгдүүлж байна. Тухайлбал, сонгуулийн кампанит ажлынхаа хүрээнд Трамп дайныг нэг өдрийн дотор дуусгана гэж мэдэгдэж байсан. Харин Путин Даваа гаригт сөргөлдөөнийг дарж, харилцан ашиг сонирхолд тулгуурласан урт хугацааны шийдэлд хүрэхийн тулд гал зогсоох хэлэлцээр хийхэд бэлэн гэдгээ илтгэв.