Улаанбаатар хотын захирагч Х.Нямбаатар “Туулын хурдны замыг барихтай холбогдуулж “Да хүрээ”, “Нарантуул” захыг хурдны замынхаа хоёр талд гаргана” гэж “бүлт үсрэв”. Газар чөлөөлөлт удахгүй эхлэх юм байх.  Уг нь ч зах худалдааны төвүүдээ хотоос гаргачихвал түгжрэл буурахад нэмэртэй нь үнэн. Гэвч биелэх нь юу л бол.

Х.Нямбаатарыг Улаанбаатар хотын захирагч болохоос 10-аад жилийн өмнө экс дарга Э.Бат-Үүл “Да хүрээ” болон “Өгөөмөр” захыг нийслэлээс гаргаж, түгжрэлийг бууруулна гэж мэдэгдэж байв. Дараа нь Улаанбаатар хотын захирагчаар томилогдсон С.Амарсайхан мөн л 100 айл дахь барилгын материал худалдаалдаг зах, төвүүдийг нүүлгэнэ гэж амласан, бас л биеллээ олоогүй.

Нийслэлчүүд үе, үеийн захирагч нараасаа зах, худалдааны төвүүдийг нүүлгэж, түгжрэл сааруулна гэх үлгэрийг нь сонссоор удаж байна.

Эцэстээ Улаанбаатар хотын захирагч бүхэн зах, худалдааны төвүүдийг нийслэлээс гаргана гэж хулхин дээр цэцэг ургуулдаг боллоо гэж хэлэхэд хэтрүүлсэн болохгүй.

Ер нь ч тэгээд хурдны зам баригдаж ашиглалтад ортол өдий.  Дархан-Улаанбаатар хотыг холбосон 220 км зам барихад долоо найман жил ноцолдсон улс хурдны зам барина гэдэг юу л бол. Тэр тусмаа газар чөлөөлнө гэдэг чинь маш их хөрөнгө мөнгө , цаг хугацаа шаардсан ажил. Анхнаасаа аж ахуй нэгжүүдэд олгочихсон газрыг төрийн нэрээр шууд булааж авах боломжгүй, тодорхой нөхөн төлбөр олгож таарна.  Нөхөн төлбөр дээрээ хоёр тал харилцан тохиролцохгүй бол газар чөлөөлөлт хийгдэхгүй.

Иймээс хотоос захуудыг гаргана гэж ярихаа болино уу даа. Ядаж эхлээд Туулын хурдны зам барих газруудаа чөлөөлчих. Яагаа ч үгүй түүхий ажлыг эртнээс болчих юм шиг ярьдаг нь эцэстээ худалч нэр зүүхэд ч хүргэж байна.

Г.ХОРОЛ