УИХ дахь Ардчилсан намын бүлэг өнөөдрийн /2025.01.20/ хуралдаанаараа Монгол Улсад Газрын тос боловсруулах үйлдвэр барих төслийг шалган судлах, холбогдох санал дүгнэлт, шийдвэрийн төсөл гаргах үүрэг бүхий Аж үйлдвэржилтийн бодлогын байнгын хорооны ажлын хэсгийн мэдээллийг сонсчээ.

Мэдээллийг тус ажлын хэсгийн ахлагч УИХ-ын гишүүн Л.Мөнхбаясгалан, Үндэсний аудитын газрын эрсдэлийн удирдлагын газрын захирал Д.Отгонбаяр, УИХ дахь Ардчилсан намын бүлгийн зөвлөх, эдийн засагч А.Батпүрэв нар өгчээ.

Газрын тос боловсруулах үйлдвэрийг барьж дуусгахад нэмэлт санхүүжилт шаардлагатай байгаа тул Монгол Улсын Засгийн газар Энэтхэгээс 462.2 сая ам.доллар нэмж авахаар болж, УИХ-аар зээлийн хэлэлцээрийг хэлэлцүүлж буй.

Зээлийн нөхцөл нь өмнө байгуулсан хэлэлцээрүүдтэй адил жилийн 1.75 хувийн хүү, үйлчилгээний шимтгэл болон хөрөнгө нөөцлөн баталгаажуулсны шимтгэл тус бүр 0.5 хувь, үндсэн өрийн төлбөрөөс эхний таван жил чөлөөлөгдөх, нийт 20 жилийн хугацаатай байна.

УИХ-аар зээлийн хэлэлцээрийг соёрхон баталбал Газрын тос боловсруулах үйлдвэрийг барих ажил зогсолтгүй үргэлжилнэ.

Засгийн газар бүрэн эрхийнхээ хугацаанд нийт 14 мега төсөл хэрэгжүүлэх зорилт тавьснаас хамгийн тэргүүнд өгөөжөө өгөх төсөл нь энэхүү Газрын тос боловсруулах үйлдвэр байх тухай Сангийн сайд Б.Жавхлан мэдэгдээд буй.

Тэгвэл УИХ дахь Ардчилсан намын бүлэг ажлын хэсгийнхний мэдээллийг сонслоо.

Мөн бүлэг Нийслэл Улаанбаатар хотын 2040 он хүртэлх хөгжлийн ерөнхий төлөвлөгөөг батлах тухай УИХ-ын тогтоолын төслийн  тухай мэдээллийг сонссон байна. УИХ-ын гишүүн, Хот байгуулалт, барилга орон сууцжуулалтын сайд Ж.Батсуурь болон албаны хүмүүс тогтоолын төслийн танилцуулгыг хийж гишүүдийн асуултад хариулт өгчээ.

Г.ХОРОЛ