АНУ-д өнгөрөгч амралтын өдрүүдэд "Дэлхийн цасны баяр" зохион байгуулагдлаа. Тус тэмцээнд олон орны мөсөн сийлбэрчид оролцсоноос Монголын "Шонхор" баг түрүүлж,"Дэлхийн цасны баяр"-т түрүүлсэн анхны Монгол баг болжээ.

Тодруулбал, Монголын мөсөн сийлбэрчид "Дуу хоолой" гэх бүтээлийг сийлсэн бөгөөд эх орноо төлөөлөн Ц.Батмөнх, Б.Говьсайхан, А.Ихбанди нарын сийлбэрчид оролцжээ.

Үүний өмнө БНХАУ-ын Харбин хотод зохион байгуулагдсан мөсөн сийлбэрийн тэмцээнд Монголын сийлбэрчид оролцож, тэргүүн байр эзэлсэн юм. Тус тэмцээнд, Хятад, БНСУ, Орос, Испани, Америк, Эквадор, Франц, Энэтхэг, Мексик, Серби, Монтенегро зэрэг орны 60 гаруй сийлбэрч оролцсон бөгөөд Монгол Улсын баг тамирчид нэг алт, нэг мөнгөн медаль хүртсэн билээ.