Оросын шүүх талийгаач Алексей Навальныйн гурван өмгөөлөгчийг "хэт туйлширсан" хэргээр хорих ял оноосон талаар бие даасан мэдээллийн "Mediazona" мэдээлэв. Тодруулбал, Вадим Кобзев, Алексей Липцер, Игорь Сергунин нарыг 2023 оны аравдугаар сард Навальный болон түүний холбоотнууд хооронд нууц мэдээлэл дамжуулж, шоронгоос улс төрийн үйл ажиллагаа явуулахад нь тусалсан хэмээн баривчилсан юм. Мөрдөн байцаагчдын мэдэгдсэнээр, тухайн өмгөөлөгчид өөрсдийн эрх зүйн байдлаа ашиглаж хэт даврагч гэмт хэргийг төлөвлөсөн, бэлтгэж, идэвхжүүлсэн гэв.

Кобзев, Липцер нар хэргийг үгүйсгэж байгаа бол Сергунин буруугаа хүлээсэн байна.

Владимир мужийн Петушки дүүргийн шүүхээс Кобзевт 5.5 жил, Липцерд 5 жил, Сергунинд 3.5 жилийн хорих ял оноожээ. Суллагдсаных нь дараа гурван жилийн хугацаанд өмгөөлөгчөөр ажиллах эрхийг нь хасах юм байна. Дүүргийн прокурорын албанаас гурван өмгөөлөгчдөд таван жил 11 сарын хорих ял ногдуулах хүсэлтэй байсан ч шүүхийн бүрэлдэхүүнээс зөвхөн шүүх хурлыг хаалттай явуулах хүсэлтийг нь зөвшөөрсөн байв. Баасан гаригт болсон шүүх хурлыг сурвалжлахаар олон тооны сэтгүүлч иржээ. Гэвч хэн нэгэн "Хунта ичээч" гэж хашхирсны дараа  сэтгүүлчдийг шүүхийн танхимаас албадан гаргасан аж. Мөн энэ үеэр дөрвөн сэтгүүлчийг шүүх хурал дуустал хорьсон байна.

Энэ талаар талийгаач Навальныйн эхнэр Юлия Навальная "Х" хуудсанд дээр бичихдээ "Тухайн гурван өмгөөлөгч нь улс төрийн хоригдол болж байгаа тул нэн даруй суллах хэрэгтэй" гэж шүүхийн байгууллагыг шүүмжилсэн байна.

Ерөнхийдөө Навальныйн хамтрагчдыг хэлмэгдүүлж, ял оноож буй. Жишээлбэл, Оросын бие даасан дөрвөн сэтгүүлч Навальныйн багтай хамтран ажилласан гэх үндэслэлээр хэт даврагч гэмт хэрэг үйлдсэн гэж буруутгагдсан байдаг. Мөн Навальныйн Авлигатай тэмцэх санг Оросын эрх баригчид 2021 онд "хэт даврагч" хэмээн зарлаж, бүх ажилтан, дэмжигчдийг нь эрүүгийн гэмт хэрэгт татаж байжээ.