Мэргэжлийн сүмогийн Хацү башё Токио хотын Рёогокү Кокүгикан хотноо үргэлжилж байна. Башёгийн долоо дахь өдөр өмнөх өдрүүдтэй харьцуулахад шуугиан тарьсан барилдаан бараг л гарсангүй. Ёкозүна Тэрүнофүжи Г.Ган-Эрдэнэ зодог тайлсан учир энэ башёгоос дараагийн аварга төрөх учиртай. Үүний төлөө ч озэки Котозакүра болон озэки Хошорюү С.Бямбасүрэн нар зүтгэж буй.

Хошорюү С.Бямбасүрэн өчигдөр нэг ч ялагдаагүй байсан Охог ялж, эргэн башёг тэргүүлж эхэллээ. Түрүүлвэл аварга цол хүртэх тэрбээр одоогоор зургаан даваа, нэг унаатай явна. Харин озэки Котозакүра Гонояамаг давж, тав дараалан ялагдаад байсан тааруу цувралаа зогсоов. Түүний түрүүлэх, ёкозүна цол хүртэх зорилго бараг л талаар болж байх шиг.

Монгол бөхчүүдийн тухайд Киришима Б.Лхагвасүрэн комүсүби Вакатакакагэг дийлж, дөрвөн даваа, гурван унаатай болжээ. Түүнийг эргэн комүсүби, сэкивакэ, озэки цолондоо хүрнэ гэж сүмо сонирхогчид хүлээж байна. Харин Чиёошома Г.Мөнхсайханы өрсөлдөгч Рогаг башёг үргэлжлүүлэх боломжгүй болсон учир Чиёошомад ялалтыг өгчээ. Тэрбээр одоогоор ганц ч унаагүй, долоон даваатай башёг Кинбозаны хамтаар тэргүүлж байна.

Мөн Тамаваши Б.Мөнх-Оргил өчигдөр Нишикигиг давж, зургаа дахь даваагаа авчээ.