Хойд Солонгосын цэргүүд одоогийн янзаараа Украинд үргэлжлүүлэн тулалдаж, амиа алдсаар байвал гурван сарын дараа гэхэд бүх цэргээ алдах магадлалтайг Дайны судалгааны хүрээлэн тооцоолжээ. Уг тооцооллыг гаргахдаа одоогийн хохирогчдын тоо баримтад үндэслэсэн байна. Нарийн хэлбэл, өдөрт ойролцоогоор 92 хойд солонгос цэрэг амиа алдаж байгаа аж.

Хойд Солонгосын цэргүүд өнгөрсөн сард болсон тулаанд идэвхтэйгээр оролцсоныг Оросын цэргийн блоггерууд ч нотолсоор байна. Цаашид энэ хэвээрээ үргэлжилбэл 12 долоо хоногийн дотор буюу 2025 оны дөрөвдүгээр сарын дунд үе гэхэд бүх цэрэг нь амиа алдаж, шархдаж болзошгүй аж. Шархадсан цэргүүд нь хэзээ байлдааны ажиллагаанд эргэн орох нь тодорхойгүй.

Өмнөд Солонгосын Тагнуулын албаны тооцоолсноор Курск хотод болсон байлдааны ажиллагааны үеэр Умард Солонгосын 300 орчим цэрэг амь үрэгдэж, 2700 орчим цэрэг шархдаад байна. Зеленскийн мэдээлж буйгаар нийт хохирогчдын тоо 3800 хүрчээ.

Украинд очсон хойд солонгос цэргүүдийг элит батальоных гэж үздэг. Өмнөдийн тооцоолсноор тус батальонд 200 мянга орчим цэрэг байдаг. Хойд Солонгосын зэвсэгт хүчин нийт дүнгээрээ 1.2 сая орчим цэрэгтэй. Гэсэн ч тэдэнд байлдааны туршлага байхгүй гэдэг нь сул тал болдог.

Хэрвээ Украины фронт дахь цэргүүдийн тоо цөөрвөл Ким Жон Ун нэмэлт цэрэг илгээх эсэх нь эргэлзээтэй. Дайн дөрөв дэх жилдээ үргэлжилж буй тул талууд хэн хэн нь цэрэг, их буу, сум, зэвсгийн хомсдолд ороод буй.