УИХ-ын сонгуульд өвдөг шороодсоны дараа орон нутгийн сонгуульд өрсөлдөж, Сүхбаатар дүүргийн иргэдийг Нийслэлийн иргэдийн төлөөлөгчдийн хурал/НИТХ/-д төлөөлөх эрх авсан Б.Дөлгөөн Монголын хөрөнгийн бирж ХК-ийг удирдах болсон нь олон хүнийг алмайруулаад байна.

Учир нь, НИТХ-ын төлөөлөгч давхар алба хаших тохиолдол бий ч нийслэлтэй холбоотой асуудлыг хариуцаж ажилладаг. Харин эдийн засагч Б.Дөлгөөний хувьд Монголын хөрөнгийн бирж ХК-ийг удирдах болсон нь нийслэлийн асуудлыг гаргуунд нь хаяхаар шийдэв үү гэдэг шүүмжлэлийг араасаа дагуулаад байна. Б.Дөлгөөнөөр Монголын хөрөнгийн биржийг удирдуулах шийдвэрийг Төлөөлөн удирдах зөвлөлөөс  гаргалаа ч саналыг нь авахгүйгээр дээрх албан тушаалд томилох учиргүй. Иймээс л НИТХ-д сонгогдчихвол Сүхбаатар дүүргийг хөгжүүлэх амлалт өгсөн нь зөвхөн сонгуульд зориулсан шоу болж таараад байна. Үнэхээр НИТХ-д дүүргийн иргэдээ төлөөлөн ажилласан шиг ажиллах  хүсэл эрмэлзэл байсан бол биржийг удирдах саналыг хүлээн авахгүй байж болох л байсан.

Монголд ганц Б.Дөлгөөн эдийн засагч биш, маш олон эдийн засагч бий. Гадаадын шилдэг их сургууль төгссөн залуучууд ч олон байгаа. Тэднээс сонголт хийх бүрэн боломжтой ч заавал нэг нам дагасан хүнээр Монголын хөрөнгийн бирж ХК-ийг удирдуулах сонирхол байна гэдэг нь төрийн өмчит компаниуд хэзээ ч олон нийтийн болж, олон улсын жишигт нийцнэ гэдэгт итгэх боломжгүй болгож буй.

Нөгөө талдаа Улаанбаатар хот асуудал ихтэй, агаар, хөрсний бохирдолтой, түгжрэлтэй түүнээсээ салах гэж нэг хэсэг нь арга чаргаа барж, өдөр шөнөгүй ажиллаж байхад харин Б.Дөлгөөн ажлынхаа үндсэн цагийг Монголын хөрөнгийн бирж ХК-д зориулах нь хэр шударга вэ. Ингэж байхаар нөхөн сонгууль явуулж, нэг мандатаа өгсөн нь дээргүй юу.

Г.ХОРОЛ