Пакистаны агаарын тээврийн онгоц Эйфелийн цамхагийг чиглэн нисч буйг харуулсан сурталчилгаа шүүмжлэл дагуулаад байна. Зурагт хуудас дээр “Парис, бид өнөөдөр очиж байна” гэсэн үгийг бичжээ. Энэ нь Пакистаны олон улсын агаарын тээврийн компани Франц руу хийх нислэгээ сэргээж буйг сурталчлах зорилготой байв.

Гэвч энэ зар сурталчилгаа олон нийтэд 2001 оны есдүгээр сарын 11-ний өдөр АНУ-д болсон террорист халдлагыг сануулжээ.

Эргэн сануулахад, тухайн өдөр амиа золиослогч этгээдүүд зорчигч тээврийн дөрвөн онгоцыг барьцаалан Нью-Йорк дахь Дэлхийн худалдааны төв болон Вашингтон дахь Пентагоны ихэр цамхагийг мөргөснөөр 3000 орчим хүн амиа алдсан билээ. Эхний хоёр онгоц Нью-Йорк дахь Дэлхийн худалдааны төвийн ихэр цамхагийг, гурав дахь онгоц Пентагоны ихэр цамхагийг мөргөжээ. Харин дөрөв дэх онгоц Пенсильвани дахь талбайд осолдсон бөгөөд Капитолын барилга руу халдах зорилготой байсан гэж таамаглажээ.

Сурталчилгааны зураг өнгөрсөн долоо хоногт цахим сүлжээнд нийтлэгдсэнээсээ хойш 21 сая гаруй хандалт авчээ. Үүний зэрэгцээ маш их эсэргүүцэлтэй тулгарсан байна. Нэгэн хэрэглэгч “Х” платформдоо “Энэ одоо сурталчилгаа юу, заналхийлэл үү” гэжээ. Мөн өөр нэг хэрэглэгч “Маркетингийн менежерээ хал” гэсэн сэтгэгдэл бичсэн байв.

Пакистаны ерөнхий сайд Шехбаз Шариф уг асуудлыг шалгахыг тушаасан бол шадар сайд Исхак Дар мөн шүүмжилсэн мэдэгдэл хийжээ.

Харин Пакистаны олон улсын агаарын тээврийн компани энэ талаар ямар нэг мэдэгдэл хийгээгүй байна. Гэхдээ тус компанийн хувьд ийм төрлийн асуудалд орж буй нь анхны тохиолдол биш. Тодруулбал, 1979 онд тус компани хос цамхагийн дээгүүр зорчигч тээврийн онгоцны сүүдэр тусч буй дүрслэлтэй сурталчилгаа гаргаж байжээ. Үүнээс гадна олны доог тохуу, шүүмжлэлийн бай болсон бусад тохиолдол ч бий. 2017 онд болсон аймшигтай ослын дараа тус компанийн ажилчид азгүйтлийг зайлуулахын тулд ямаа тахиж байв. Мөн 2019 онд агаарын хөлгийн үйлчлэгч нартаа зургаан сарын дотор илүүдэл жингээ хасахыг даалгаж байжээ.