"Эрдэнэс монгол" ХХК-ийн Гүйцэтгэх захирал С.Наранцогт болон "Орано Майнинг" С.А.С-ын ТУЗ-ийн дарга Николас Маэс нар өнөөдөр /2025.01.17/хэвлэлийн мэдээлэл хийлээ.

"Орано Майнинг" С.А.С-ын ТУЗ-ийн дарга Николас Маэс:

-Миний хувьд болон Франц улсын төрийн өмчит "Орано" группийн хувьд Монгол Улсын Засгийн газартай уг түүхэн гэрээг байгуулж байгаа нь нэр төрийн хэрэг юм. Уг гэрээг байгуулснаар хоёр тал удаан хугацааны харилцан ашигтай хамтын ажиллагаанд шинэ цар хүрээг нэмлээ. Миний сая хэлсэнчлэн энэ түүхэн гэрээ нь түүхэн ач холбогдолтой төдийгүй, Монгол Улсад хөгжүүлж ирсэн "Орано Майнинг" группийн 27 жилийн түншлэлийн илэрхийлэл болж байна. Мөн түүнчлэн "Орано Майнинг" группийн эрэл хайгуул , олборлолтын арга технологи, хөдөлмөрийн аюулгүй байдал, байгаль орчин хамгааллаас гадна орон нутгийн хөгжилд оруулж ирсэн бидний туршлагыг өндрөөр үнэлж байгаагийн илэрхийлэл болж байна.

Миний хувьд та бүхэнд онцлон хэлэхэд, энэ төслийг илэрхийлж байгаа тоон баримтууд үнэхээр гайхалтай. Төсөл бол 90 мянган тонн ураны нөөцтэй, 30 жилийн хугацаанд ажиллах уурхайн капитал зардал нь нийт 1.6 тэрбум ам.доллар байна.

Үүний зэрэгцээ төслийн хүрээнд 1600 шууд болон шууд бус ажлын байр бий болно. Эдгээр ажлын байрны дийлэнхэд Монгол Улсын иргэн ажиллана. Энэ уурхайгаас жил бүр олборлох, уранаар үйлдвэрлэх эрчим хүч маань 55 сая тонн нүүрснээс гаргах эрчим хүчтэй тэнцэх юм. Ингэснээр уурхай ажиллах хугацаанд 4 тэрбум тонн нүүрс хүчлийн хий үйлдвэрлэхээс урьдчилан сэргийлэх төдийгүй, Монгол Улс уур амьсгалын өөрчлөлттэй тэмцэхэд идэвхтэй хувь нэмэр оруулахад дэмжлэг үзүүлнэ. Үнэхээр гайхалтай. Өнөө өглөө бидний байгуулсан хөрөнгө оруулалтын гэрээнд Монгол Улсын иргэд төдийгүй, "Орано Майнинг" группийн хувьд харилцан ашигтай гэрээ болж байна. "Орано Майнинг" группийн хувьд энэ төслийг хэрэгжүүлснээр дэлхий даяарх цөмийн эрчим хүч үйлдвэрлэгч үйлчлүүлэгчиддээ уран бүтээгдэхүүний нийлүүлэлтийг солонгоруулах баталгаа болж байна. Монгол Улсын хувьд эдийн засгийн хөгжлөө хурдасгах төдийгүй цөмийн салбарт стратегийн ач холбогдол бүхий тоглогч болох боломж бүрдэж байна. Хөрөнгө оруулалтын гэрээгээр төслийн шууд үр өгөөжийн дийлэнх Монгол Улсад ирэх явдал нь баталгаажуулсан билээ.

Иймдээ ч Монгол Улсын эдийн засгийг тогтвортой өсгөхөд хувь нэмрээ оруулах юм. "Орано Майнинг" групп гэрээний хүрээнд олон улсын шилдэг стандарт, нормыг хэрэгжүүлж, байгаль орчныг хамгаалах, хариуцлагатай уул уурхайг хөгжүүлэх болно.

Ингэснээр Монголын уран олборлолтын хөгжилд жишиг болох уурхайн суурийг бид тавьж байна. Уг гэрээг байгуулснаар Монгол, Франц улсын найрсаг хамтын ажиллагааг бэхжүүлж, хамтын ажиллагаагаа стратегийн түвшинд очих эхлэлийг тавьж байна. Хөрөнгө оруулалтын гэрээг бодит ажил болгоход ихээхэн хувь нэмэр оруулсан эрхмүүдэд талархал илэрхийлье. Тэр дундаа Монгол Улсын Ерөнхийлөгч, Ерөнхий сайд нарт талархал илэрхийлье. Мөн УИХ-ын дарга Д.Амарбаясгалан, УИХ-ын дэд дарга, УИХ-ын эрхэм гишүүд, нийслэлийн Засаг дарга, ЗГХЭГ-ын дарга Н.Учралаар ахлуулсан ажлын хэсгийн бүх гишүүд, "Эрдэнэс монгол" ХХК-ийн Гүйцэтгэх захирал С.Наранцогт, "Мон-Атом" компанийн захирал, Франц улсын Гадаад харилцаа, хилийн чанад дахь франц иргэдийн асуудал эрхэлсэн сайд, Франц улсаас Монгол Улсад суугаа бүрэн эрхэт Элчин сайд хатагтай, "Орано Майнинг" групп болон "Бадрах энержи" компанийн төлөөлөлд талархал илэрхийлж байна. Баярлалаа.

"Эрдэнэс монгол" ХХК-ийн Гүйцэтгэх захирал С.Наранцогт:

-"Орано Майнинг" группийн Монгол дахь төлөөлөгч тухайн гэрээг хэлэлцэх явцад харилцан ойлголцож, харилцан буулт хийж, гэрээг амжилттай болгоход ихээхэн хувь нэмэр оруулсныг цохон тэмдэглэж байна. Засгийн газраас үр дүн мэдээлсэн Цөмийн энергийн хуульд нэмэлт өөрчлөлт оруулах тухай, Үндэсний баялгийн санд нэмэлт өөрчлөлт оруулах тухай хуулийн төсөл болон стратегийн ач холбогдол бүхий ашигт малтмалын ордын төрийн эзэмшлийн хувь хэмжээг оруулах тухай УИХ-ын тогтоолын төслийг байнгын хороо, чуулганы нэгдсэн хуралдааны хэлэлцүүлэгт бэлтгэх ажлын хэсгийн ахлагч, УИХ-ын дэд дарга Б.Пүрэвдорж болон ажлын хэсэгт орж ажилласан УИХ-ын эрхэм гишүүддээ талархал илэрхийлж байна.

Мөн энэ гэрээг эцэслэн боловсруулах хэлэлцээрийн явцад идэвхтэй ажилласан гадаад, дотоодын зөвлөх компаниуддаа талархал илэрхийлье. Эцэст нь, дэлхийн уур амьсгалын өөрчлөлтийг сааруулах, хүлэмжийн хий ялгарал багатай хөгжлийг бий болгох эрхэм үйлсэд Монгол Улс бодитой хувь нэмэр оруулах түүхэн эхлэл тавигдаж байгааг онцлон тэмдэглэж байна.

Гэрэл зургийг Л.Энх-Оргил