Агаарын бохирдлыг бууруулах Үндэсний хорооны дарга, БОУАӨ-ийн сайд С.Одонтуяагийн хамаарал бүхий компани Улаанбаатар хотын гэр хорооллын айл өрхүүдийн эрчим хүчний зохистой хэрэглээг дэмжих хүрээнд 32 мянган өрхөд нийлүүлэх давхар шаталтат зуух худалдан авах тендерт шалгарсан гэсэн мэдээлэл хөврөх болов.  С.Одонтуяагийн хамаарал бүхий гэж нэрлэгдээд буй “Экоресурс” компани өмнө нь утаагүй зуух нийлүүлэх өндөр дүнтэй хоёр ч тендерт шалгарч байжээ.

Тодруулбал, Өмнөговь аймгийн Даланзадгад суманд 2.6 тэрбум төгрөгийн, Нийслэлийн худалдан авах ажиллагааны газраас зарласан 2 тэрбум төгрөгийн тендерт тус тус шалгарч байсан туршлагатай.

Тэгвэл  32 мянган давхар шаталтат зуухыг нийслэлийн гэр хорооллын өрхүүдэд тараах ажлыг ихэд эсэргүүцэж байгаа хүн бол өнгөрсөн НИТХ-ын сонгуульд Чингэлтэй дүүрэгт нэр дэвшээд ялагдсан, “Хашаандаа сайхан амьдаръя” төслийн хэрэгжүүлэгч Ц.Түмэнбаяр юм. Тэрбээр хэлэхдээ “Аймгуудад тараагаад амжилтгүй байсан зуухыг Баянгол дүүрэгт тараасан, дахиад амжилтгүй болсон 32.000 мянган зуух Улаанбаатарт тараагдах гэж байна. Шахааны зуух нь халдаггүй. Хоёр цаг тутамд галлахгүй бол унтардаг” хэмээн шүүмжилжээ. АН-ын С.Одонтуяа гишүүн өөрийн сонгогдсон Баянгол дүүрэгтээ 2000 гаруй зуух тараасан гэдэг.

Ц.Түмэнбаярыг ч гэсэн анх “Дөл” зуухыг санаачлан айл өрхүүдэд тараасан хэмээдэг. Өнөөдөр тэрбээр “Хашаандаа сайхан амьдаръя” төслийн хүрээнд хот, хөдөөгийн олон айлуудад гэр дулаалах төслүүдийг хэрэгжүүлдэг. С.Одонтуяа, Ц.Түмэнбаяр нар нь энгийн нэг зуухны бизнесээс болов уу, энгийн нэг зуухнаас болсон их хэмжээний эрх ашгаас шалтгаалав уу АН-ын дарга, цэрэг хооронд ан цав үүсээд байгаа аж.

Т.ОД