Насны хишиг тэтгэмжийг энэ оноос эхлэн анх удаа авах ахмад настныг бүртгэлээ хийлгэхийг Хөдөлмөр халамж үйлчилгээний газраас мэдээлж байна.

Тодруулбал, 65 нас хүрсэн ахмад настан ehalamj.mn-ээр, эсвэл Халамжийн мэргэжилтэнд хандан үйлчилгээний хүсэлтээ гаргана. Бүртгэлд хамрагдах ахмад настан нь 1959 оны долдугаар сарын 15-наас 1960 оны гуравдугаар сарын 3-ны хооронд төрсөн хүмүүс байх юм. Насны хишигт хамрагдах ахмад настан нь иргэний үнэмлэхээ авч очихоос гадна өөрийн нэр дээр ашигладаг банкны дансны дугаараа мэдэж байх шаардлагатай. Мөн бүртгэл хийлгэхдээ заавал өөрийн биеэр очих шаардлагагүй, итгэмжлэгдсэн төлөөлөгчөөрөө дамжуулж болно.

Харин 1960 оны гуравдугаар сарын 3-наас хойш төрсөн ахмадуудын хувьд Үндэсний их баяр наадмын зеэр олгох бүртгэлд хамрагдах юм байна.

Ахмад настны тухай хуульд зааснаар 65 ба түүнээс дээш төрсөн ахмад настанд жилд хоёр удаа буюу Цагаан сар, Үндэсний их баяр наадмаар насны хишиг олгодог юм.

Тодруулбал, 65-69 настай ахмад настанд 50 мянган төгрөг, 70-79 настай ахмад настанд 80 мянган төгрөг, 80-89 настай ахмад настанд 150 мянган төгрөг, 90 ба түүнээс дээш настай ахмад настанд 250 мянган төгрөгийн насны хишиг жил бүрийн Цагаан сар болон Улсын баяр наадмын өмнө олгодог. 2017 оны нэгдүгээр сарын 1-нээс эхлэн олгож эхэлсэн юм.

Г.ХОРОЛ