Мэргэжлийн сүмогийн Хацү башё Токио хотын алдарт Рёогокү Кокүгикан ордонд үргэлжилж байна. Башёгийн дөрөв дэх өдөр буюу өчигдөр/2025.01.15/ сонирхолтой барилдаанууд боллоо. Бэртлээсээ эргэн ирсэн ёкозүна Тэрүнофүжи Г.Ган-Эрдэнэ башёг тааруу эхлүүлэв. Тэрбээр өчигдөр Тобизарүд өвдөг шороодож, хоёр даваа, хоёр унаатай болжээ.

Тэгвэл озэки Хошорюү С.Бямбасүрэн хүссэн эхлэлээ тавьж, дөрвөн даваа, ганц ч унаагүй башёг тэргүүлж байна. Түүний хувьд өчигдөр Таканошог давсан аж. Хэрэв тэрбээр энэ башёд түрүүлвэл ёкозүна цол хүртэх учиртай. Түүний адилаар ёкозүна цол горьдож буй озэки Котозакүра харин ганц даваа, гурван унаатайгаар сүүл мушгиж байна. Түүнийг өчигдөр Киришима Б.Лхагвасүрэн давж, энэ оны анхны даваагаа авчээ.

Киришима Б.Лхагвасүрэн башё бүрт сайн барилдаж, эргэн озэки цолоо авч, ёкозүна цолны ярианд багтах ёстой билээ.

Хошорюүгийн адилаар Чиёошома Г.Мөнхсайхан болон Тамаваши Б.Мөнх-Оргил нар мөн унаагүй явна. Чиёошома өчигдөр Эндог давсан бол Тамаваши Такэрүфүжиг дийлж, тус бүр дөрөв дэх даваагаа авчээ.

Бусад монгол бөхчүүдийн тухайд Ошома П.Дэлгэрбаяр Митакэүмиг, Онокацү Б.Чойжилсүрэн Мидорифүжиг тус тус давжээ. Харин Тамашохо Э.Энхманлай өвдөг шороодсон гэнэ.