Цэргийн онц байдал зарлаж, улс оронд тогтворгүй байдал үүсгэснийх нь төлөө Өмнөд Солонгосын ерөнхийлөгч Юн Сук Ёлыг өчигдөр /2025.01.15/ баривчилсан билээ. Түүнийг баривчилсан даруйдаа Сөүлээс өмнө зүгт орших Гвачон дахь Өндөр албан тушаалтнуудын авлигатай тэмцэх газрын оффист 10 гаруй цаг байцаалт авчээ.

Харин өнөөдөр түүнийг 14:00 цагаас эхлэн байцаах аж. Байцаалтыг өглөөгүүр товлосон байсан боловч Юн Сук Ёл эрүүл мэндийн шалтгаанаар цагийг хойшлуулсан гэж Өндөр албан тушаалтнуудын авлигатай тэмцэх газар мэдэгдлээ.

Юн Сук Ёлын өмгөөлөгч Юн Гап Гюн хэлэхдээ "Ерөнхийлөгчийн бие муу байгаа. Өчигдөр тэр өөрийн байр сууриа бүрэн тайлбарласан тул өөр байцаалгаад байх зүйл үгүй" гэжээ. Түүнчлэн Юныг цагдан хорих шийдвэр нь хууль ёсны эсэхийг шалгах хүсэлтийг түүний өмгөөлөгчид гаргажээ.

Юн Лхагва гаригт хоригдсоныхоо дараа өөрийн гараар бичсэн захидалдаа "цэргийн онц байдал зарлах нь гэмт хэрэг биш" гэжээ. Энэ захидлынхаа зургийг тэр цахим хуудсандаа нийтлээд, "Цэргийн онц байдал бол гэмт хэрэг биш. Энэ бол үндэсний хямралыг даван туулах хүрээнд ерөнхийлөгчийн эрх мэдлийг хэрэгжүүлж буй үйлдэл" гэжээ. Цэргийн онц байдлын тунхаглалыг бослоготой адилтгаж буйг үнэхээр утгагүй гэж Юн үзэж байна.