Израиль, Хамасын талууд Газын зурваст гал зогсоох, барьцааны хүмүүсийг суллах хэлэлцээрийг эцэслэн баталж чадлаа. Ийнхүү 15 сар үргэлжилсэн дайн дуусгавар болох цаг дөхсөн тул ард иргэд гудамж талбайд гарч, баяраа тэмдэглэж эхэлжээ. Хэлэлцээрийг Израилийн сайд нарын танхим эцэслэн баталсны дараа энэ сарын 19 буюу Ням гаригаас эхлэн хүчин төгөлдөр болно.

Хэлэлцээрийн бусад нарийн нөхцлүүдийг одоо ч хэлэлцсээр байгааг Израилийн ерөнхий сайд Беньямин Нетаньяху мэдэгдлээ. Мөн тэрбээр хэлэлцээрийг дэмжин ажилласан АНУ-ын ерөнхийлөгч Жо Байденд талархал илэрхийлэв. Тэгвэл Хамасын удирдагч Халил аль-Хайя энэхүү хэлэлцээрийг палестинчуудын тэсвэр тэвчээрийн үр дүн гэж мэдэгджээ.

2023 оны аравдугаар сарын 7-нд дайн эхэлснээс хойш Газын зурваст 46700 гаруй хүн амиа алдав. Бүс нутгийн 2.3 сая хүн амын дийлэнх нь орон гэрээ орхин дүрвэжээ.

Израилийн мэдэгдэж буйгаар 94 хүн Хамасын барьцаанд байгаа аж. Тэдний 34-ийг нь нас барсан гэж үзэж байна.

Гал зогсоох хэлэлцээр эхэлмэгц Израилийн цэргүүд Газын хүн ам шигүү суурьшсан бүс нутгуудаас ухран гарч, дүрвэсэн палестинчуудад орон гэртээ буцаж ирэх боломж олгоно. Мөн өдөр бүр хэдэн зуун тусламжийн ачааны машиныг нутаг дэвсгэрт нэвтрүүлнэ. Энэ шатанд 33 барьцааны хүнийг суллана. Хэлэлцээрийн хоёр дахь шат 16 дахь өдрөөс эхлэх ба энэ үед үлдсэн барьцааны хүмүүсийг суллах юм. Цаашилбал, энэ шатанд Израилийн цэргүүд нутаг дэвсгэрийг бүрэн орхиж, тогтвортой тайван байдлыг эргүүлэн авчирна.

Хэлэлцээрийн гурав дахь шат буюу эцсийн шатанд барьцааны хүмүүсийн цогцсыг эргүүлэн өгч, Газын зурвасыг сэргээн босгож эхэлнэ. Энэ ажилд маш олон жил шаардагдах нь дамжиггүй.