Монгол Улсын Их хурлын тухай хуульд зааснаар УИХ-ын гишүүний бүрэн эрхийн хугацаа нь дууссан тохиолдолд 12 сарын цалинтай тэнцэх тэтгэмж олгох зохицуулалт үйлчилж байгаа нь олон нийтийн шүүмжлэлтэй тулж буй. Иймээс УИХ-ын зарим гишүүн дээрх тэтгэмжийг зогсоох саналыг гаргахаа мэдэгдсэн. “News” агентлаг энэ долоо хоногийн VS буландаа дээрх асуудалтай холбогдуулан хоёр талын байр суурийг онцоллоо.

Сануулахад, УИХ-ын гишүүний хамгийн бага цалин сарынх нь долоон сая төгрөг бол цолны нэмэгдэл зэргийг оруулан тооцоход сардаа 10 сая төгрөгийн цалинг зарим УИХ-ын гишүүн авч байна.

УИХ-ын гишүүн П.Сайнзориг:

-Аль ч улсад тухайн гишүүний бүрэн эрх дуустгавар болоод дахин улс төрийн сонгуульд оролцохгүй бол тэр тэтгэмжийг өгдөг.  Байдаг л зарчим. Тийм учраас одоогийн энэ зохицуулалтыг төрийн албаныхаа нийтлэг зарчимтай уялдуулж сайжруулах гэдэг дээр санал нэг байна. Төрийн албан хаагч, жишээлбэл, эмч, багш, эрдэмтэн  УИХ-д хууль тогтоогч хийчихээд дараа нь баталгаа байхгүй байна гэдэг маш том эрсдэл.  Зарим хүн шиг насаараа идэх бизнестэй биш хэцүү. Маргааш би ажилгүй боллоо гэхэд ар гэртээ яаж хоол унд авах вэ гэдгээс эхлээд проблем үүснэ. Тийм учраас тэтгэмжийг бүрэн эрх нь дууссан, дахин сонгуульд өрсөлдөөгүй гишүүнд өгдөг, сонгуульд өрсөлдөөд унасан бүрэн эрх нь дууссан гишүүнд өгдөггүй байхаар өөрчлөх ёстой.

Тэтгэмж хэрэггүй гээд попорч болно, эцсийн дүндээ попролтын үнэ цэнийг ард түмэн л төлдөг. Том төслүүдийн тухайн жил санхүүжих зардлыг багасгаснаар 2025 оны Монгол Улсын төсвийг алдагдалгүй төсөв баталлаа л гэсэн. Гэтэл газрын тос боловсруулах үйлдвэрийн төсөл зогсоход хүрч, яаж явуулах вэ гэдэг юм одоо яриад сууцгааж байна. Ингэж хэдүүлээ ард түмнээс оноо авч попролтыг дэмжмээргүй байна.

УИХ-ын гишүүн, Хууль зүй дотоод хэргийн сайд О.Алтангэрэл:

-УИХ-ын гишүүн гэдгээрээ бусдаас давуу эрх эдлээд, цалин мөнгө нэмж аваад байх шаардлага байхгүй. УИХ-ын гишүүний үзэл бодлоо илэрхийлэх болон үйл ажиллагаа явуулахтай нь холбоотой хуулийн хөнгөлөлтүүд байдаг болохоос ахуй амьдрал, халаасанд зориулсан хууль байж болохгүй. Энэ хууль учраас өөрчлөх боломжтой гэж бодож байна. Хэн нэг гишүүн санаачилбал би хамгийн түрүүнд гарын үсэг зураад дэмжээд явна.

1992 оноос хойш хэрэгжээд явж байгаа энэ хуулийн зохицуулалтыг өөрчлөх ёстой. Орон нутгаас сонгогдсон гээд орон байр, мөнгөний дэмжлэг авсан тохиолдол өнгөрсөн найман удаагийн парламентын түүхэнд олон байгаа юм билээ. 126 гишүүнтэй парламент хувь гишүүнтэй холбоотой эрх ямба, тэр дундаа санхүүгийн эрх ямбанаас татгалзаж жишиг тогтоовол энэ цаашдаа уламжлагдаад явна.

Г.ХОРОЛ