Хятад, Оросын худалдаа өнгөрсөн онд түүхэн дээд хэмжээнд хүрсэн гэж Даваа гаригт нийтлэгдсэн тайланд тусгажээ. Тодруулбал, Хятадын Гаалийн ерөнхий газраас мэдээлснээр, хоёр орны импорт экспортын нийт хэмжээ 244.8 тэрбум ам.долларт хүрч, 2023 онд 240.1 тэрбум ам.доллар байснаас өссөн байна. Гэсэн хэдий ч жилийн өсөлтийн хурд 2023 онд ажиглагдсан 26.3 хувийн өсөлттэй харьцуулахад мэдэгдэхүйц буурсан байна.

Ерөнхийлөгч Путин 2022 оны эхээр Украинд бүрэн хэмжээний түрэмгийлэл явуулж эхэлснээс хойш Хятад, Орос улс улс төр, эдийн засгийн түншлэлээ бэхжүүлж, АНУ болон түүний холбоотнуудын авч буй хориг арга хэмжээг буруутгасан юм. Хятадын дарга Ши Жиньпин саяхан Путинд илгээсэн шинэ оны мэндчилгээндээ ойр дотно харилцаатай байхаа онцлон тэмдэглээд, хоёр улс эвсэлд үл нэгдэх зөв замаар тууштай хөтлөлцөн урагшилсаар ирсэн гэсэн байна.

Үүний зэрэгцээ, гаалийн мэдээллээр Хятад, АНУ-ын худалдаа 2024 онд 3.7 хувиар өсч, 688.3 тэрбум долларт хүрсэн байна. Анхны бүрэн эрхийн хугацаандаа Хятадад их хэмжээний татвар ногдуулсан Дональд Трамп ирэх долоо хоногт хоёр дахь бүрэн эрхийн хугацаагаа эхлүүлэхээр зэхэж байна. Үүнээс улбаалан худалдааны бодлогоо улам чангарна гэж амлаад буй.