Калифорнийн өмнөд хэсэгт гарч буй хүчтэй гал түймэртэй тэмцэхийн тулд гал сөнөөх байгууллага агаараас улаан, ягаан өнгийн галд тэсвэртэй бүтээгдэхүүн цацаж байна. Улмаар Лос-Анжелес хотын захын дүүргүүд уран зөгнөлт кино шиг дүр зурагтай болжээ. Албаныхны мэдээлснээр, уг бодис нь "Phos-Chek" нэртэй бүтээгдэхүүн бөгөөд үүнийг "Perimeter" нэртэй компани худалдаалдаг. Мөн энэ нь галын дөлийг тархахаас сэргийлдэг байна.

"Phos-Chek"-ыг 1963 оноос хойш АНУ-д гал түймэртэй тэмцэхэд ашиглаж иржээ. Ялангуяа Калифорнийн Ойн аж ахуй, гал түймрээс хамгаалах хэлтэс "Phos-Chek"-ыг удаан хугацаанд ашиглаж ирсэн бөгөөд "Associated Press" агентлагийн 2022 оны тайланд дурдсанаар энэ нь дэлхийн хамгийн их ашиглагддаг галд тэсвэртэй бодис юм. Гэхдээ галын аюул дарагдсаны дараа улаан, ягаан өнгөтэй уг бодисыг даруй цэвэрлэхийг "Perimeter" компани зөвлөдөг аж.  Учир нь удах тусам "Phos-Chek"-ыг арилгахад хэцүү болдог байна.

Хэдийгээр орц найрлага нь бүрэн ил болоогүй ч "Perimeter" компани өмнө нь 80 хувь ус, 14 хувь бордооны төрлийн давс, 6 хувь будагч бодисоос бий болсон гэж онцолж байсан удаатай.

Тод өнгөтэй байдаг нь агаар дээрээс цацах онгоцны нисгэгч, гал сөнөөгчдөд орхигдуулсан газар байгаа эсэхийг хянахад туслах зориулалттай аж. Нарны гэрэлд хэд хоногийн дараа өнгө нь бүдгэрч, шороон өнгөтэй болдог юм байна.

Үүнийг голдуу хээрийн түймрийн голомтыг тойрсон бүс нутаг, галд өртөмтгий ургамал зэргийг хамгаалахад ашигладаг.

АНУ-ын Ойн албаны мэдээлснээр, сааруулагч бодис нь "түлшийг хөргөх, бүрэх замаар галын тархах хурдыг удаашруулж, хүчилтөрөгчийг шавхаж, түлшний шаталтын хурдыг удаашруулдаг. Учир нь сааруулагчийн органик бус давс нь түлшний шаталтыг өөрчилдөг" гэжээ. Гэхдээ "Phos-Chek"-ыг хэрэглэж буй нь өмнө нь маргаан дагуулж байсан юм. АНУ-ын Ойн албаны одоогийн болон хуучин ажилтнуудаас бүрдсэн бүлэг 2022 онд шүүхэд нэхэмжлэл гаргаж байжээ. Уг нэхэмжлэлд дурдсанаар, сааруулагч бодисыг байгальд асгаснаар экосистемд хортой тул холбооны ажилтнууд улсын цэвэр усны тухай хуулийг зөрчсөн гэж буруутгасан байв.

Мөн уг бодис нь цэнгэг усанд байх амьтдыг хордуулж, галын тархалтыг тогтооход ямар ч үр дүнгүй гэж маргалдаж байв.

Дараа жил нь АНУ-ын дүүргийн шүүх Ойн албаны бүлэгтэй санал нэгдсэн боловч Байгаль орчныг хамгаалах агентлагаас (EPA) зөвшөөрөл авсан цагт ашиглаж болно гэж шийдвэрлэсэн байна. Энэ хэрэг өнгөрсөн хугацаанд ой хээрийн түймэрт хохирч байсан хүмүүсийн анхаарлыг татсан байдаг.

Улмаар Лос-Анжелес хотын дээр цацаж буй "Phos-Chek"-ын талаар Ойн алба мэдээлэхдээ, энэ удаад "LC95" гэсэн орцтойг хэрэглэхээс татгалзаж, хамаагүй илүү хор багатай "MVP-Fx"-ийг ашиглаж буй.

Тус албанаас мөн усны суваг, ховордсон амьтдын амьдрах орчин зэрэг байгаль орчны эмзэг бүсэд галд тэсвэртэй бодис хаяхыг хориглосон. Харин "хүний ​​амь нас, олон нийтийн аюулгүй байдалд заналхийлсэн" тохиолдолд хоригийг хэрэгжүүлэхгүй гэж мэдэгджээ.