Өмнөд Калифорнид гарсан ой хээрийн түймэр хүчтэй салхины нөлөөгөөр газар авч, Лос Анжелес хотын бүсийг сүйрүүлээд буй. Гал түймэр хэтэрхий эрчимтэй газар авч байгаагаас улбаалан хэдэн мянган оршин суугчдыг орон гэрээсээ дүрвэхэд хүргэсэн билээ. Нүүлгэн шилжүүлсэн 80 мянган хүний дунд Холливудын алдартнууд байсан бөгөөд заримынх нь хувьд хэдэн арван жил амьдарч, хэзээ ч мартагдахааргүй дурсамж бүтээсэн орон гэрээ бүхэлд нь алдсан юм. Номхон далайн Палисадад нэгдүгээр сарын 7-ны Мягмар гаригт түймэр хүрсэн байдаг. Эл өдрийн 18:30 цагийн орчимд Итон түймэр араас нь дэгдэж, Лхагва гаригийн өглөө гэхэд Пасадена болон Алтадена даяар 10 мянган акр газрыг үнс нурам болгожээ.

Одоогийн байдлаар түймэр нийт 50 тэрбум ам.доллар давсан хохирол үүсгэсэн гэж "AccuWeather" мэдээлэв.

Белла Хадид

Загвар өмсөгч Белла Хадидын бага насаа өнгөрөөсөн гэр бүлийн байшин нь галд шатсан байна. Малибүд байрлах уг байшин нь 4.7 сая ам.долларын үнэтэй байв.

Мило Вентимиглиа

"This Is Us" киноны од Мило Вентимиглиа CBS News-т өгсөн ярилцлагадаа түүний гэр нэгдүгээр сарын 10-нд сүйрсэн гэв. Тэрбээр хэдэхдээ, "Хайртай байшингийнхаа бүхий л буланд бидний дурсамж үлдсэн байсан. Эргэн тойрон, бүх зүйл зүрх шимширмээр байна" гэжээ. Түүний байшин 5.5 сая ам.долларын үнэтэй байв.

Энтони Хопкинс

Жүжигчин Энтони Хопкинс таван унтлагын өрөө, дөрвөн угаалгын өрөө бүхий 11.5 сая ам.долларын үнэтэй тансаг байшинд амьдардаг байв. Гэвч нэгдүгээр сарын 10-нд гал түймэр түүний амьдардаг байсан хэсэгт хүрч, байшин нь шатжээ. Тэрбээр уг харамсалтай үйл явдлын талаар хэлэхдээ, "Бид бүхэн энэ галаас амссан хохирлоо эдгээх гэж хичээж байгаа ч бидний нэг нэгэндээ өгөх хайр хамгийн агуу бэлэг юм" гэжээ. Тэрбээр Малибу дахь байшингаа 2018 онд Вулсигийн гал түймэрт бараг л алдах гэж байсан удаатай.

Парис Хилтон

Телевизийн реалити шоуны од, зочид буудлын өв залгамжлагч Парис Хилтог шууд мэдээний үеэр 8,4 сая долларын үнэтэй далайн эрэг дээрх байшингаа "шатаж" байхыг олж харжээ. Тэрбээр хүүгийнхээ анх хөлд орж байсан тус байшиндаа хамгийн их хайртай байв.

Тина Ноулз

Дуучин Бейонсегийн ээж гэдгээрээ алдартай Тина Ноулз Малибугийн 10 сая ам.долларын байшингаа галд алджээ. Тэрбээр "Би Лос-Анжелес хотынхоо төлөө хичээнгүйлэн залбирч байна!! Гэсэн хэдий ч бид тэсвэр тэвчээртэй байх хэрэгтэй" гэж цахим сүлжээгээрээ дамжуулан хэлсэн юм.

Мел Гибсон

Жүжигчин, найруулагч Мел Гибсон Техас мужид Жо Роганы подкаст нэвтрүүлэгт оролцох үеэр түүний Малибу дахь гэр нь шатсан тухай хэджээ. Тэрбээр "Манай хороололд түймэр хүрсэн гэдгийг сонсоод буй тайван байх гэж хичээсэн. Байшин маань байгаа болов уу гэж бодсон. Мэдээж хэрэг очоод үзэхэд аль хэдийн шатсан байсан" гэжээ. Түүний байшин 14.5 сая ам.долларын үнэтэй байсан бөгөөд тансаг зэрэглэлд хамаарагддаг байв.

Жэйми Чунг, Брайан Гринберг нар

Жүжигчин Жэйми Чунг, Брайан Гринберг нар "мөнхийн гэр"-ээ үнс нуранги болон хувирч байгааг харуулсан видеог хуваалцжээ. Хосууд нэгдүгээр сарын 10-ны өдөр "Аз болж манай гэр бүл аюулгүй байгаа. Гэхдээ Лос-Анжелесийн бусад хүмүүс аюулд өртөж байна. Хэрэв та боломжтой бол тэдэнд хандив өгөөрэй" гэжээ.

Крисси Тейген

Крисси Тейген, Жон Леженд нар гэр бүлийн хамт амьдардаг байшингаасаа нүүлгэн шилжүүлэгдэж буйгаа мэдэгдсэн юм. Хосууд нөхцөл байдлыг сюрреалист, там шиг гэж тодорхойлон, маш их айж буйгаа цахим сүлжээндээ нийтэлжээ. Лежендийн гэр бүл 17.5 сая ам.долларын үнэтэй байшинд амьдардаг байв.

Майли Сайрус

Майли Сайрус хуучин нөхөр Лиам Хемсворттойгоо амьдарч байсан 7.9 сая үнэтэй байшин нь галд автжээ. Тэрбээр цахим хуудсаараа дамжуулан байшингаас илүү хүмүүс аюулгүй байгаа гэж найдаж буйгаа илэрхийлсэн юм.

Галын голомтод өртсөн хорооллуудын үнэ цэнээс илүү хүний амь нас эрсдэхгүй байх нь хамгийн чухал гэж эрх баригчид мэдэгдэж буй. Гэхдээ түймэрт хохирол амсаагүй ойролцоох хорооллуудын орон сууц, байшингийн үнэ 10 хувиар буурчээ. Гал түймэр унтрах юм бол хохирол хамгийн их амссан газруудын зах зээлийн үнэ төдийлөн сайжрахгүй аж.

Сүүлийн 10 жилийн хугацаанд Калифорнид ой хээрийн түймэр гарах нь олширч байна. Тухайлбал, тус мужид гарсан хамгийн том 10 түймрийн ес нь саяхан гарчээ. Улмаар орон сууцны даатгалын зардал АНУ-ын эдийн засгийн чадамжид хохирол учруулах хэмжээнд хүрч болзошгүй юм. Гэхдээ Калифорни мужийн хувьд даатгуулагчдад шинэ дүрэм танилцуулж, даатгалын хураамжийг нэмэгдүүлж байсан удаатай тул гал түймэр унтарсны дараа эдийн засагт хохирол амсуулахгүй байх тал дээр ажиллаж магадгүй. Жишээлбэл, нэг сая долларын байшингийн даатгалын зардал жилд 5 мянган ам.доллараас 10 мянган ам.доллар болсон. Үүнээс улбаалан эрсдэл өндөртэй газруудад байшингийн үнэ түймрийн дараа долоон хувиар буурч магадгүй байна.