Ёкозүна Тэрүнофүжи Г.Ган-Эрдэнэ дэвжээнээ эргэн ирэхэд бэлэн болжээ. Тэрбээр өнгөрсөн оны долдугаар сараас хойш бэртлийн улмаас барилдаагүй байсан юм. Энэ оны эхний башё өнөөдөр/2025.01.12/ Токио хотын Рёогокү Кокүгикан ордонд эхэлнэ.

Тэрүнофүжи Г.Ган-Эрдэнэ ч 11 дэх түрүүгээ хүртэхийг зорьж байна. Түүний хувьд өнгөрсөн онд хоёрхон башёд зодоглосон бөгөөд хоёуланд нь түрүүлсэн. Ер нь л бэртэл гэмтэл нь сэдрэхгүй, хүндрэхгүй бол барилдсан башё бүртээ түрүүлж байгаа гэхэд хилсдэхгүй. Өөрөөр хэлбэл, түүнийг зөвхөн бэртэл гэмтэл л зогсоож байна. Тэрүнофүжигийн хоёр өвдөг болон чихрийн шижингийн асуудал түүнийг удаан хугацаанд зовоож буй.

Өдгөө 33 настай монгол аварга дахин башё өнжих эрхгүй гэж хэлж болно. Олон башё дараалан өнжиж буй түүнийг зодог тайлуулах хүсэл Ёкозүнагийн зөвлөлд бий. Түүний халааг авах дараагийн аваргуудыг ч хайгаад эхэлчихсэн. Гэхдээ Тэрүнофүжи энэ асуудалд санаа зовохгүй байна. Тэрбээр ярихдаа "Хэрэв болохгүй бол болохгүй шүү дээ. Би ямар ч шийдвэр гарсан үр дүнтэй нь санал нийлнэ" гэжээ.

Озэки Котозакүра болон озэки Хошорюү С.Бямбасүрэн нар ёкозүна цолонд тун ойртож ирсэн. Энэ нэгдүгээр сарын башёд түрүүлвэл эсвэл түрүүлэх хэмжээний барилдвал ёкозүна цолыг нь сүмогийн холбоо өгөхөд бэлэн гэдгээ мэдэгдчихсэн аж.