Өмнөд Солонгосын ерөнхийлөгч Юн Сук Ёл албан тушаалаасаа огцрох шаардлагатай болох хэмжээнд хүрсэн ч хамаагүй Үндсэн хуулийн цэц түүний хэрэгт ямар ч шийдвэр гаргасан хүлээн зөвшөөрнө гэж мэдэгджээ. Түүний өмгөөлөгч энэ талаар олон нийтэд дамжуулсан бөгөөд ерөнхийлөгч шүүхийн шийдвэрийг давж заалдахгүй гэдгийг онцлон тэмдэглэсэн байна.

Өмнө нь Юн хоёр ч удаа шүүхийн зарлах дуудах хуудсыг үл тоомсорлосон. Гэхдээ Авлигатай тэмцэх алба түүнийг баривчлах ажиллагаа явуулж, бүтэлгүйтсэнээс хойш өөрийн биеэр шүүхэд очих болжээ. Одоогийн байдлаар, Юны албан тушаалын бүрэн эрхийг түдгэлзүүлсэн байгаа бөгөөд өнгөрсөн сард цэргийн онц байдал зарласан хэргээр эрүүгийн хэрэгт шалгагдаж буй. Мөн Өмнөд Солонгосын түүхэн дэх анхны хоригдох өндөр магадлалтай ерөнхийлөгч болоод байна.

Юны хамгаалалтын албаныхан өнгөрсөн долоо хоногт түүнийг баривчлах оролдлогыг эсэргүүцсэн. Авлигатай тэмцэх газар цаашид ч Юныг баривчлах ажиллагаа явуулна. Гэхдээ  Юн болон түүний дэмжигчид үүнийг улс төрийн зорилготой,  доромжлох гэсэн оролдлого гэж үзэж байна. Энэ нь ардчиллыг дэмжигч болон эсэргүүцэгчдийн хооронд өрнөж буй тулаан шиг нөхцөл байдлыг үүсгэсэн гэж Юны өмгөөлөгч хэлсэн байна. Юны хувьд засгийн газрыг хохироож буй "төрийн эсрэг" хүчнийхэнтэй тэмцэхийн тулд цэргийн байдал зарласан гэж одоог хүртэл маргаж буй.