УИХ-ын Ёс зүйн дэгийн байнгын хорооны өнөөдрийн /2025.12.08/ хуралдаанаар Ерөнхий сайд, Засгийн газрын гишүүнээр томилогдсон УИХ-ын гишүүн чуулганы ажиллагаанд оролцох журам батлах тухай асуудлыг хэлэлцлээ.

Журамд Засгийн газрынхаа эсрэг удаа дараа байр суурь илэрхийлсэн сайдад хариуцлага тооцох саналыг Ерөнхий сайдад хүргүүлнэ. Засгийн газрын гишүүн нь өвчтэй, чөлөөтэй, томилолттойгоос бусад тохиолдолд Байнгын хороо болон дэд хорооны хуралд оролцоно. Хэрэв дээрх хороодын хуралдаанд оролцох боломжгүй бол хуралдаан даргалагчид өмнөх өдөр нь мэдэгдэж чөлөө авна.

Засгийн газраас санаачлан боловсруулсан хууль, тогтоолын төслийг УИХ-аар хэлэлцэх шатанд асуулт асууж, санал илэрхийлэхгүй. Хэрвээ Засгийн газрын өргөн барьсан төслүүдтэй холбоотойгоор санал гаргах бол тухайн асуудлыг эрхэлсэн сайд гаргана гэх зохицуулалт тусгажээ.

Дээрх журмыг УИХ-ын Ёс зүйн дэгийн байнгын хорооны гишүүн А.Ариунзаяа тэргүүтэй гишүүд боловсруулсан байна.

Журмыг хэлэлцэх үед УИХ-ын гишүүд “Засгийн газрын гишүүн нь асуулт асууж, санал хэлэх эрхгүй байхаар журамлах нь хууль зөрчсөн үйлдэл болохгүй юу гэдэг асуудлыг хөндлөө.

Мөн Засгийн газрын гишүүн нь хэдэн удаа танхимынхаа эсрэг байр суурь илэрхийлбэл хариуцлага тооцох талаар ч тодруулсан юм.

Журмыг боловсруулсан УИХ-ын гишүүн А.Ариунзаяагийн тайлбараар бол хуулиас давсан журам боловсруулаагүй. Засгийн газар нь УИХ-д хуулийн төслийг өргөн барихаасаа өмнө танхимаараа хэлэлцэж, нэгдсэн байр сууринд хүрдэг. Гэтэл танхимаасаа өргөн мэдүүлсэн хууль, тогтоолын төслүүд УИХ-д орж ирэхээр Засгийн газрын сайд нь УИХ-ын гишүүнийхээ хувиар гэж яриад асуулт асуугаад, санал хэлээд байж таарахгүй. Засгийн газрынхаа эсрэг байр суурь удаа дараа илэрхийлж байгаа сайдыг Ёс зүй сахилга хариуцлагын байнгын хороогоор хэлэлцэж, шийдвэр гаргана. Гаргасан шийдвэрээ Ерөнхий сайдад хүргүүлснээр тухайн сайдад хариуцлага тооцуулах асуудал хэрэгжих ажээ.

Байнгын хорооны гишүүд тус журмыг батлахыг дэмжсэн юм.

Г.ХОРОЛ