Хөлбөмбөгийн амьд домог, нидерланд од Патрик Клюйверт Индонезийн шигшээ багийн ахлах дасгалжуулагчаар ажиллахаар хоёр жилийн гэрээ байгуулжээ. Тэрбээр энэ нэгдүгээр сарын 12-ны өдөр Жакарта хотноо албан ёсоор хэвлэлийн бага хурал хийж, ажлаа хүлээн авах аж. Индонезийн хөлбөмбөгийн холбоо ч түүнийг шигшээ багийг нь удирдан дэлхийн аваргад оролцуулж чадна гэдэгт итгэлтэй байна.

Индонезийн хөлбөмбөгийн холбоо саяхан солонгос дасгалжуулагч Шин Та-Ёныг халсан. Тэрбээр бараг таван жил Индонезийн шигшээ багийг удирдсан ч хүлээсэн амжилтыг үзүүлээгүй гэнэ.

Хэзээнээсээ Индонезийн шигшээ багт индонези-нидерланд гаралтай тамирчид олноороо тоглодог байсан. Тиймээс ч Патрик Клюйвертыг тэдгээр тоглогчидтой харилцахад амар гэж үзжээ. Нөгөө талаараа Клюйверт нь Суринам гаралтай. Өмнөд Америкийн Суринам нь хуучин Нидерландын колони байсан улс. Түүнчлэн 19 болон 20 дугаар зууны үед индонезиуд Суринам руу дүрвэж байсан түүхтэй.

Индонезийн шигшээ баг 2026 оны ДАШТ-д оролцох боломжтой ч Япон, Австрали, Саудын Арабыг давна гэдэг хэцүү. Гэхдээ боломжгүй зүйл үгүй.

Клюйверт тоглогч ахуйдаа шилдэг довтлогч байсан. Тэрбээр Аяаксын хамтаар 1995 онд УЕФА Аваргуудын лигт түрүүлж, 1999 онд Барселонагийн хамтаар Ла лигт түрүүлсэн. Мөн АС Милан, Ньюкасл Юнайтед, Лилль, Валенсиа, ПСВ багуудад тоглож байсан намтартай.