Цахим спортын "CS2" төрлийн мэргэжлийн багуудын шинэ улирал удахгүй эхэлнэ. Үүнээс өмнө багууд бүрэлдэхүүндээ өөрчлөлт хийж, тамирчид амарч байна. Тэгвэл энэ үед Украины стриймер Вадим Козаков буюу "Evelone192" нэгэн сонирхолтой тэмцээнийг зохион байгуулжээ. 200 мянган ам.долларын шагналын сантай түүний онлайн тэмцээн нь хоёрын эсрэг хоёр гэнэ.

Хоёр хүний бүрэлдэхүүнтэй нийт найман баг өрсөлджээ. Улмаар ялагчаар "donk" болон "m0NESY" нарын баг түрүүлсэн аж. Тэд тэмцээний турш учраа бүрээ дийлж, финалд "baz", "kyousuke" нарын багийг 3-0 гэсэн харьцаатай хожсон аж.

"Kyousuke"-г энэ жил мэргэжлийн "CS2"-д цахиур хагална гэж олон хүмүүс үзэж буй. Максим Лукин гэх 16 настай хүүг аль багт орох вэ гэдэг сонирхол татаж байна. Түүний хувьд одоогоор "Spirit"-ийн академид харьяалагдаж байгаа.

Дээрх тэмцээнд "s1mple", "Perfecto" нар нэг баг болж тоглосон бөгөөд хоёр хожигдож, ердөө нэг хожжээ. Мөн "rain", "broky" болон "YEKINDAR", "ultimate" нар баг болж, оролцсон аж.

Түрүүлсэн баг 120 мянган ам.долларын эзэд болсон бол дэд аваргууд 60 мянган ам.доллар, гуравдугаарт орсон баг 20 мянган ам.долларыг халааслажээ.

Тэмцээний шилдгээр "donk" тодорч, 10 мянган ам.доллар хүртсэн. Мөн хутга ашиглан өрсөлдөгчөө устгасан тохиолдолд 2,500 ам.долларын бонус өгсөн гэнэ.