УИХ-ын Аюулгүй байдал гадаад бодлогын байнгын хорооны өнөөдрийн хуралдаанаар Монгол Улсын Ерөнхийлөгчөөс санал болгосон Элчин сайд нарыг томилох саналыг зөвшилцөх тухай хэлэлцлээ.

Монгол Улсын Ерөнхийлөгч бүрэн эрхийнхээ хүрээнд Монгол Улсаас Польш улсад суух Элчин сайдад УИХ-ын гишүүн асан Н.Оюундарийг нэр дэвшүүлжээ.Байнгын хорооны хуралдаанд оролцсон гишүүдийн олонхи нь саналыг дэмжсэнээр УИХ-ын чуулганы нэгдсэн хуралдаанд оруулахаар болж, шийдвэрлэлээ. Элчин сайдад нэр дэвшигч Н.Оюундарийг танилцуулъя.

ТӨГССӨН СУРГУУЛЬ, МЭРГЭЖИЛ: 

1995 онд Сэрүүлэг дээд сургууль, бизнесийн удирдлага, бакалавр

1998 онд Ниделандын Вант Улсын Маастрихтын их сургууль, бизнесийн удирдлага, эдийн засагч магистр

АЖИЛЛАСАН БАЙДАЛ:

• 1995-1996 онд Монголын Үндэсний бүтээмжийн төвд зөвлөх
• 1996-1997 онд Монголын бизнесийн хөгжлийн агентлаг Европын холбооны ТАСИС хөтөлбөр зөвлөх
• 1997-1998 онд Нэгдсэн Үндэстний байгууллагын Үйлдвэрийн газрын өөрчлөн байгуулалтын төсөлд зөвлөх
• 1999-2000 онд Дэлхийн банк, Жижиг, дунд үйлдвэрийг дэмжих төсөлд зөвлөх
• 2000-2004 онд Байгаль орчны яамны Гадаад харилцааны хэлтсийн дарга
• 2004-2006 онд Байгаль орчинны яамны Стратеги төлөвлөлт, бодлого зохицуулалтын газрын дарга
• 2006-2007 онд НҮБ-ын Байгаль орчны хөтөлбөр Дундад Азийг хариусан зөвлөх
• 2008-2012 онд Нийслэлийн Иргэдийн төлөөлөгчдийн Хурлын төлөөлөгч
• 2008-2010 ондБНХАУ-ын Бээжин хот дахь Улаанбаатар хотын төлөөлөгч
• 2010-2014 онд “Бльюмон” групп ХХК зөвлөх
• 2014-2015 онд Гадаад хэргийн яамны дэд сайд
• 2015-2016 онд “Бльюмон” групп ХХК зөвлөх
• 2016-2020 онд Монгол Улсын Их Хурлын гишүүн

Санал хураахын өмнө УИХ-ын гишүүд асуулт тавьж, хариулт авав.

УИХ-ын гишүүн Д.Энхтүвшин:

-Манай эдийн засаг том зах зээл рүү зорих ёстой. Польш улстай Монгол Улсын хувьд эдийн засгийн харилцаан дээр хамтран ажиллахад ямар боломжууд байна вэ. Польш улс нь Европтоо аж үйлдвэрлэлээр томид ордог тул ажиллах хүчин сургах, ноу хау шилжүүлэх талд Монгол Улсын хувьд том боломжууд байна гэж харж байгаа. Энэ асуудал дээр нэр дэвшигчээс санал сонсоё.

Улс төрийн албан тушаалтан ч юм уу, улс төрийн чиг үүрэгтэй хүмүүс Элчин сайдаар томилогддог. Энэ харьцаан дээр Гадаад харилцааны яам ямар бодлого барьж ажиллаж байна вэ.

Элчин сайдад нэр дэвшигч Н.Оюундарь:

-Монгол, Польшийн эдийн засгийн харилцаа өргөжин хөгжиж байгаа. Сүүлийн 3 жилийн хугацаанд эдийн засгийн эргэлт хоёр дахин нэмэгдсэн. Худалдааны эргэлт 100 -гаад сая ам.долларт хүрсэн. Цаашдаа ч өсөх магадлал байгаа. Импортолж байгаа бараа бүтээгдэхүүн маш их байдаг. Хүнсний бүтээгдэхүүн, барлигын материал, химийн бүтээгдэхүүнийг Монгол Улс Польшоос импортолдог. Европын холбоо дотроо Польш улс нь эдийн засгаараа Герман, Швейцарь улсын дараа гуравт ордог.

Польш улсын Ерөнхийлөгч Анджей Дуда Монгол Улсад айлчлах үеэр  Монгол, Польшийн бизнес форум зохион байгуулсан. Бизнес форумд хоёр талаас 200 орчим төлөөлөгч оролцож, харилцан хамтарч ажиллах талаар яриа хэлэлцээнүүдийг хийсэн. Боломж маш их байгаа. Польш улсад 100 гаад Монгол иргэн ажиллаж амьдардаг. Уламжлалт анагаах ухааны чиглэлээр ажилладаг. Монголоос уламжлалт анагаахын чиглэлийн эмийн бүтээгдэхүүн, ноос ноолуур, малын гаралтай бүтээгдэхүүн экспортолдог. Хөдөө аж ахуйн чиглэлээр хамтын ажиллагаа хийх боломж бололцоо байдаг. Монгол Улс нь 30 гаруй оронтой Засгийн газрын хэлэлцээр байгуулсан. Барилга, хөдөө аж ахуй, эм эмийн салбарт эдийн засгийн харилцааг өргөжүүлэх боломж байгаа.

Гадаад харилцааны сайд Б.Батцэцэг:

-Томилогдсон Дипломат төлөөлөгчийн газар 50 хүрсэн. 34 нь Элчин сайдын яам. Байнгын төлөөлөгчийн газар, Худалдааны төлөөлөгчийн газар, Ерөнхий консулын газар, консулын газар байгаа. Сүүлийн дөрвөн жилд хийсэн Элчин сайдын томилгоон мэргэжлийн болсон. 22 хувь нь буюу мэргэжлийн бус улс төр болон бусад салбараас улс төрийн шийдвэр гаргаад Элчин сайд томилсон.  Өөр байгууллагаас Элчин сайдаар томилогдсон хүмүүсийн хувьд төрийн албаны дадлага туршлагатай, удирдах ажилтны дадлага туршлагатай, улс төрийн туршлагатай хүмүүсээс бүрдэж байгаа. Мөн Элчин сайд нараас гадна дотор нь ажиллаж байгаа ажилтнуудын хувьд ихэвчлэн Гадаад харилцааны яамнаас томилдог. Гэхдээ бас бусад мэргэжлийн байгууллагаас томилгоо хийдэг. Энэ нь 30 орчим хувь байгаа, цаашдаа энэ томилгоог илүү мэргэжлийн болгох шаардлагатай.

Г.ХОРОЛ