Хятадын Харбин хотноо зохион байгуулдсан мөсөн сийлбэрийн тэмцээнд Монголын сийлбэрчид оролцож, тэргүүн байр эзэлжээ. Тодруулбал, Хятад, БНСУ, Орос, Испани, Америк, Эквадор, Франц, Энэтхэг, Мексик, Серби, Монтенегро зэрэг орны 60 гаруй сийлбэрч оролцсон тус тэмцээнд Монгол Улсын баг тамирчид нэг алт, нэг мөнгөн медаль хүртсэн байна.

36 дахь удаагаа болж буй энэхүү тэмцээнд сийлбэрч З.Ганжаргал, Х.Алтанхүү нарын баг түрүүлсэн бол Д.Цэрэнбат, Б.Баярсайхан нар дэд байр эзэлжээ.

Харбины мөсөн сийлбэрийн тэмцээнд Монголын сийлбэрчид 2010 оноос хойш тогтмол өрсөлдөж байгаа юм. Монгол уран бүтээлчид олон улсын тэмцээнд өрсөлдөхдөө ур ухаанаараа ялгарч чаддаг. Зарим орны уран бүтээлчид баригдмал хийцтэй байдаг бол бид үндэсний урлаг, шинж чанартай хийхээс гадна шинэлэг орчин үеийн чиг хандлага, урсгалыг хослуулж өгдгөөрөө онцлог. Томоохон фестивалийн шүүгчид уран сийлбэрийн хийцлэлээс гадна утга санаа, цагаа олсон мессежийг дэлхий нийтэд өгч чадаж байгаа эсэхийг хардаг. Мөн тэмцээний явцад бүтээлийн утга санаа, зохиомж, уран бүтээлчийн ур чадвар, гүйцэтгэл зэргийг харж маш нарийн шалгуураар шалгаруулдаг гэдгийг мөсөн сийлбэрчид хэлж байсан юм.