Сторм Блэйр нэртэй хүчтэй шуурга АНУ болон Канадын зарим хэсэгт шуурч, 60 сая гаруй хүнийг цаг агаарын аюулаас болгоомжтой байхыг сэрэмжлүүлээд байна. Тодруулбал, Канзас, Миссури, Кентакки, Виржиниа, Баруун Виржиниа, Арканзас болон Нью Жерсигийн зарим хэсэгт сүүлийн 10 жилийн түүхэнд тохиолдоогүй их хэмжээний цасан шуурга болох төлөвтэй байгаа тул бүс нутгийн эрх баригчид онц байдал зарлажээ. Туйлын эргүүлэг гэж нэрлэгддэг хүйтэн агаарын системээс үүдэлтэй уг шуурга аль хэдийн зарим газарт 30 см хүртэлх цас хаясан байна. Агаарын температур хэвийн хэмжээнээс -14°C хүртэл бага байгаагаас гадна хүйтэн бороо орно. Олон тооны нислэг, галт тэрэгний үйлчилгээ цуцлагдсан эсвэл хойшлогдсон бөгөөд аюулгүй байдлын үүднээс зарим хурдны замыг хаажээ.

Хүйтний эрч чангарч, цасан шуурга шуурч, жолоо барихад аюултай нөхцөл байдал үүсгэсэн Сторм Блэйр шуурганы нөлөө Канадын зарим хэсэгт хүчтэй илэрч байна. Улмаар тус улсын засгийн газар -40 хэм хүртэл хүйтэрч болзошгүйг анхааруулж, яаралтайгаас бусад тохиолдолд гэрээсээ гарахгүй байхыг иргэдэд сануулав. Түүнчлэн, аялал жуулчлалын нөхцөл байдал хүндэрч, сургууль, албан байгууллагын үйл ажиллагааг хаасан байна. Цаг уурчдын эмээж буйгаар, Сторм Блэйр зүүн зүгт эрчээ авч байгаа тул хар салхи ч үүсч болзошгүй байна. Хувийн цаг уурч Райан Мауе хэлэхдээ, "Энэ бол эмх замбараагүй байдал, гамшгийг үүсгэж болзошгүй хүчтэй шуурга юм. Бидний удаан хугацаанд үзээгүй хүйтэн өвөл болох төлөвтэй байна" гэжээ.