Гиннесийн номонд орсон дэлхийн хамгийн өндөр настай хүн Томико Итоока 116 насандаа таалал төгссөн гэж Японы Ашия хотын алба Бямба гаригт мэдэгдэв. Хиого мужийн Ашия хотын өндөр настан хариуцах албаны дарга Ёшицүгү Нагатагийн мэдэгдсэнээр, Итока  өнгөрсөн арванхоёрдугаар сарын 29-нд Ашия хотын өндөр настны асрамжийн газарт нас баржээ.

Итоока нь 1908 оны тавдугаар сард төрсөн бөгөөд гадил жимс, йогуртын амттай "Calpis" ундаанд дуртай байжээ.

Тэрээр өнгөрсөн онд 117 настай Мария Браняс нас барсны дараа дэлхийн хамгийн өндөр настай хүн болсон гэж Геронтологийн судалгааны бүлэг тайлбарлав. Итоока дэлхийн хамгийн өндөр настай хүн болсон гэх мэдэгдлийн дараа "Баярлалаа" гэж хэлж байжээ. Мөн өнгөрсөн онд төрсөн өдрөө тэмдэглэхдээ хотын даргаас цэцгийн баглаа, бялуу зэргийг бэлэг болгон авсан байна. Осака хотод төрсөн Итоока ахлах сургуульд сурч байхдаа гар бөмбөгийн спортоор хичээллэдэг байсан төдийгүй үргэлж хөгжилтэй, өөдрөг сэтгэлгээтэй нэгэн гэж сайшаагддаг байжээ. Түүнчлэн залуу насандаа 3076 метрийн өндөр Онтаке уулын оргилд хоёр удаа хүрч байсан амжилттай.

Тэрээр 20 настайдаа нөхөрт гарч, хоёр хүү, хоёр охин төрүүлсэн байна.

Дэлхийн хоёрдугаар дайны үед Итоока нөхрийнхөө нэхмэлийн үйлдвэрийг хариуцаж үлдсэн бөгөөд хожим 1979 онд бэлэвсэрч хоцорсноор Нара хотод ганцаараа амьдрах болжээ.  Оршуулах ёслолд нь нэг охин, хүү болон таван ач, зээ зэрэг ойр дотнын гэр бүл, нөхөд нь оролцсон байна. Геронтологийн судалгааны бүлгийн мэдээлснээр, дараагийн хамгийн өндөр настай хүн нь Итоокагаас 16 хоногийн дараа төрсөн 116 настай бразилын гэлэнмаа Ина Канабарро Лукас юм.