Саяхан болж өнгөрсөн Шанхайн Мэйжороор Монголын "The MongolZ" баг бахдам сайхан амжилтыг үзүүлж, элэг нэгтнүүдээ, үнэнч фэнүүдээ баярлуулсан. Тэдний амжилт дан ганц Монголын гэлтгүй Азийн "Counter Strike"-ийн хөгжил ямар байгааг дэлхий нийтэд харуулж, тивийнхээ нэр нүүрийг тахалсан билээ. Тэгвэл тэдний амжилтаас улбаалан тоглоомыг хөгжүүлэгч "Valve"-ийн зүгээс 2025 оны Мэйжор тэмцээнийг 32 багтайгаар зохион байгуулахаар болжээ. "The MongolZ" шиг олон баг боломжоо хүлээгээд сууж байгаа гэдэг үүднээс энэхүү шийдвэрийг гаргажээ.

Хуучин 24 баг Мэйжорт өрсөлддөг байсан бол ирэх Мэйжороос эхлэн 32 баг өрсөлдөнө. Ингэхдээ Ази тивээс гурван баг өрсөлддөг байсан бол энэ тоо тав болжээ. Түүнчлэн Азийн тэргүүн баг шууд гуравдугаар шат буюу сүүлийн плей-оффын шатнаас тэмцээнээ эхлүүлэх аж. Харин үлдсэн дөрвөн баг нь нэгдүгээр шатнаас тэмцээнээ эхлүүлнэ.

Остин Мэйжорт бүс нутгуудаас дараах байдлаар багууд өрсөлдөнө.

• Европ тив – 16 баг
• Америк тив – 11 баг
• Ази тив – 5 баг

Өмнө нь Ази, Номхон далайн бүс нутгаас ердөө хоёр баг Мэйжорт өрсөлддөг байв. Харин "The MongolZ"-ийн ачаар энэ тоо өнгөрсөн жил гурав болж, энэ удаад тав боллоо. Бусад монгол багууд ч мөрөөдлөө биелүүлэхэд улам дөхөм болж ирэв. "ATOX", "The Huns", "IHC Esports", "Chinggis Warriors" тэргүүтэй багуудад сайхан боломж гарч ирсэн. Мөн Хятад, Австралийн багууд бий.