Германы Гадаад хэргийн сайд Анналена Баербок Баасан гаригт Сирийн нийслэл Дамаск хотод гэнэтийн айлчлал хийлээ. Тэрбээр Сирийн шинэ де-факто эрх баригчдад Герман болон Европын холбоотой харилцаагаа сэргээх болзол тавьж байна. Энэхүү айлчлал нь Европ-Сири, Герман-Сирийн улс төрийн шинэ эхлэл болох боломжтой аж.

Францын Гадаад хэргийн сайд Жан-Ноэль Барро түүнтэй хамт айлчлан иржээ. Башар аль-Ассадын дэглэм нуран унаснаас хойш Сирид айлчилж буй анхны Европын Гадаад хэргийн сайд нар нь Баербок, Барро нар болж байна.

Баербок хэлэхдээ "Сирийн шинэ нийгэм, улс төрийн үйл явцад хүйс, яс үндэс, шашин шүтлэг хамааралгүй сири хүн бүр оролцож чадвал шинэ эхлэл бий болно" гэжээ. Мөн тэрбээр засгийн эрхийг энхийн замаар шилжүүлэх, нийгмийг эвлэрүүлэх, сэргээн босгох үйлсэд туслах хүсэлтэй байгаагаа илэрхийлсэн байна. Хэт даврагч, радикал бүлэглэлүүдэд орших газар үгүй гэдгийг Баербок онцолсон юм.

Сирийн шинэ удирдагч Ахмед аль-Шараа саяхан мэдэгдэл хийхдээ шинэ үндсэн хуулийн төслийг өргөн барихад гурван жил, сонгууль хүртэл нэг жил шаардлагатай гэсэн юм. 10 гаруй жил үргэлжилсэн иргэний дайны дараа тус улс хуваагдмал хэвээр байна. Ассадын дэглэм унасан ч гэлээ дайсагнагч зэвсэгт бүлэглэлүүд эрх мэдлийн төлөө тэмцэлдсээр байна.

Харин Хаят Тахрир аль-Шам бүлэглэлийг өнгөрсөн хугацаанд юу хийсэн, хаанаас гаралтайг мэднэ гэдгээ Баербок хэлжээ. "Тиймээс тус бүлэглэлийг үйлдлээр нь шүүнэ. Эргэлзээтэй зүйлс байгаа ч гэлээ энэ чухал мөчид Сирийн ард түмнийг дэмжих боломжийг алдах ёсгүй" гэв.

Мөн тэрбээр "Герман улс Сирийн дотоод үйл явцыг гадны хүчин зүйлээс хамааралтайгаар тасалдуулахгүйн тулд ажиллаж байна. Үүнд, хөрш зэргэлдээ орнууд Сирийн тусгаар тогтнол, нутаг дэвсгэрийн бүрэн бүтэн байдлыг хүндэтгэхгүй байх зэрэг орно" гэжээ. Ингэж хэлэхдээ тэр Турк, Израилийн нэрийг дурдаагүй ч эдгээр улс Сирийн ашиг сонирхолтой зөрчилддөг гэж буруутгагдсаар байгаа билээ.