Хайнанийг зорих зочдын тоо болон эдийн засгийн хүчирхэг байдал алдагдсантай холбогдуулан тус мужийн "duty-free" буюу татваргүй бараа бүтээгдэхүүний орлого буурчээ. Тодруулбал, тансаг зэрэглэлийн дэлгүүр, далайн эргээрээ алдартай Хайнань 2023 онд 43.76 тэрбум юанийн татваргүй бараа бүтээгдэхүүн борлуулсан нь 2024 онд 30.94 тэрбум юань  болтлоо буурчээ.

Мөн жуулчдын тоо 6,76 саяас 5,68 сая болж бараг 16 хувиар буурсан үзүүлэлт гарсан байна.

Уг бууралтад хэд хэдэн хүчин зүйл нөлөөлсөн. Гадаад валют суларч, Малайз руу визгүй зорчих гэх мэт сонирхол татахуйц аялал жуулчлалын бодлого нь Хятадаас гадуурх аялал, худалдааг нэмэгдүүлэх болсон байна. Мөн Хятадын дотоодын хэрэглэгчид гадаадад хямд бараа бүтээгдэхүүн олон гэж үзэх болсон байна. Үүнээс болж тансаг хэрэглээ, тэр дундаа гоо сайхны татваргүй бүтээгдэхүүний борлуулалт буурсан аж.

"LVMH", "Kering" зэрэг тансаг зэрэглэлийн брэндүүдийн хувьд "Covid-19"-ын дараах өсөлтийг хүлээж байсан ч борлуулалт улам муудаж буй. Үүний нэг шалтгаан нь Хайнань дахь жижиглэнгийн худалдаа 2020 онд арлын татваргүй худалдааны төвийн худалдан авалтын хязгаарт өөрчлөлт орсноос улбаатай аж. Түүнчлэн, худалдан авалтын үзүүлэлт буурч буй нь Хайнань 2025 он гэхэд татваргүй худалдааны бүс болно гэх төлөвлөгөөнд саад учруулж байна. Гэсэн хэдий ч тус мужид үйлчилгээ эрхлэх байгууллагууд Япон, Сингапур зэрэг бусад татваргүй газраас худалдан авагчдыг нь татаж чадна гэдэгтээ найдах болжээ.

Гэхдээ өргөн цар хүрээгээр авч үзвэл, дан ганц Хайнань муж гэлтгүй Хятадын хэрэглэгчид тансаг зэрэглэлийн болон чухал бус зүйлд мөнгө зарцуулах сонирхол нь багассан.

Энэ нь жижиглэн худалдааны өсөлтөд сөргөөр нөлөөлж байгаа бөгөөд 2024 оны арваннэгдүгээр сар хүртэлх үзүүлэлт ердөө гурван хувь байсан аж. Энэ нь анх төлөвлөгдөж байсан 4.6 хувийн өсөлтөөс харьцангуй бага байгааг харуулсан юм. Тиймээс тус улсын жижиглэн худалдаачид 2025 онд худалдан авалтын хэрэглээг нэмэгдүүлэх бодлого явуулахыг засгийн газарт уриалах болжээ.