Улаанбаатар хотын эрчим хүчний хэрэглээ жилээс жилд өсөн нэмэгдэж, 2023-2024 онд шилжих жилийн өвөл 200 МВт эрчим хүчний дутагдалтай өвөлжсөн. Өөрөөр хэлбэл, хэсэгчилсэн цахилгааны хязгаарлалтууд хийж, эрчим хүчээ хэмнэж өвөлжсөн. Энэ байдалд шуурхай зохицуулалт хийж, Бөөрөлжүүтийн 150 МВт хүчин чадалтай цахилгаан станц, Багануурын 50 МВт хүчин чадалтай батарей хуримтлуурын станцыг 2024 ондоо багтааж ашиглалтад оруулахаар төлөвлөж, төлөвлөгөөний дагуу баригдаж, 2024 оны арванхоёрдугаар сард төвийн бүсийн нэгдсэн системд эрчим хүчийг нийлүүлж байна. Ийнхүү Улаанбаатар хотын хэмжээнд дутагдалтай байсан 200 МВт эрчим хүчийг нөхөх хоёр том станцын бүтээн байгуулалтыг богино хугацаанд хийж дуусгасан нь Монгол Улсын эрчим хүчний салбарт томоохон бүтээн байгуулалт боллоо.

Монгол Улсад хамгийн сүүлд 1984 онд ТЭЦ-4 дулааны цахилгаан станцыг ашиглалтад оруулснаас хойш 40 жилийн дараах өндөр хүчин чадалтай анхны станц нь Бөөрөлжүүтийн цахилгаан станц болсон юм. Уг станцын барих төлөвлөлтийг аль 2011 онд эхлүүлсэн хэдий ч төсөлд гацаа, саад их байсан. Улмаар Улаанбаатар хотын зүгээс анх удаагаа дотоодын зах зээлд 500 тэрбум төгрөгийн бонд арилжаалж, тус бондоос 300 тэрбум төгрөгийг Бөөрөлжүүтийн цахилгаан станцад хөрөнгө оруулснаар цахилгаан станцын бүтээн байгуулалт жигдрэх шатандаа орсон юм.

Бөөрөлжүүтийн эхний ээлжийн 150 МВт цахилгаан станцад технологийн 60 ширхэг байгууламж баригдсан. Цахилгаан станцын барилга угсралтын ажил эхлэх хүртэл нүүрсний ордыг илрүүлж, нөөц батлах, уурхайн ажлыг эхлүүлэх, цахилгаан станц барих зөвшөөрөл авах, ажлын гэрээнүүд байгуулах, санхүүжилт босгох зэрэг 10 гаруй жилийн хугацааг зарцуулжээ. Олон үе шат, саад бэрхшээлийг туулж, олон улсын болон Монгол Улсын инженер, техникийн ажилчдын хөлс хүчээр Монгол Улсад 40 жилийн дараах томоохон бүтээн байгуулалт, 150 МВт эрчим хүчний эх үүсвэрийг 2024 онд бүтээн байгуулж чадлаа.