Европын хөлбөмбөгийн нэгдүгээр сарын солилцоо наймааны цонх албан ёсоор нээгдлээ. Энэ жилийн өвлийн цонх өнгөрсөн жилүүдтэй харьцуулахад сонирхолтой өрнөх шинжтэй. Бэртэл гэмтэл болон завгүй хуваарьтай байх Манчестер Сити болон Арсенал багууд хэнийг авчрах вэ гэдгээс гадна Манчестер Юнайтед, Тоттенхэм Хотспур багууд ямар шинэчлэлийг хийх вэ гэдэг асуултуудын хариулт удахгүй тодорхой болно. Мөн Европын шилдгүүдийг урвуулдаг уламжлал тогтсон Саудын Араб, Туркийн лигүүд хэнийг онилох бол гэдэг сонирхолтой. Ийнхүү та бүхэндээ энэ өвөл багаа солих боломжтой оддыг танилцуулъя.

МАРКУС РАШФОРД

Манчестер Юнайтедын довтлогч энэ өвөл багаа солих нь бараг ойлгомжтой болсон. Өөрөө ч шинэ сорилтод бэлэн байна гэдгээ мэдэгдчихсэн. Юнайтедын шинэ босс Рубен Аморим түүнийг гараанд гаргах бүү хэл сэлгээнд ч суулгахгүй байгаа. Харин сүүлд Ньюкаслын эсрэг гэнэт ашигласан. Ийм ойлгомжгүй байдал түүнийг залхааж байгаа нь гарцаагүй. Түүний долоо хоногийн 325 мянган фунтын цалин ч санхүү мөнгөний хэмнэлт хийж байгаа Юнайтедэд тээр болж буй.

Эх сурвалжуудын мэдээлж буйгаар 27 настай довтлогчийг Европын багууд бус Саудын Арабын багууд сонирхож байгаа гэнэ.

ВИКТОР ГЁКЕРЕС

Спортингийн Виктор яг одоогоор Европын хамгийн хүсэмжит довтлогчоор тодроод байна. Энэ улирал 27 тоглолтод 27 гоол оруулсан түүнийг Арсенал, Манчестер Юнайтед багууд сонирхож байгаагаа ил тод мэдэгдсэн. Түүний гэрээг чөлөөлөх үнэ 100 сая евро гэхээр өнөө үед өндөртөө тооцогдохгүй. Тэгэхээр энэ өвөл багаа солиход гайхах зүйлгүй. Гол нь хаашаа вэ?

МАРТИН ЗУБИМЕНДИ

Реал Сосьедадын испани хагас хамгаалагчийг Арне Слот багтаа авчрахыг үнэхээр хүсч байгаа. Өнгөрсөн зун Ливерпуль түүний араас эрчимтэй хөөцөлдсөн ч өөрийн болгож чадаагүй. Тэгвэл энэ өвөл дахин санаархана. Гэхдээ тэдний замд Родригоо бэртэлд алдсан Манчестер Сити саад болох шинжтэй. Ситигийн хувьд Зубименди бол Родриг орлох нэгэн. Сүүлд Реал Мадрид ч нэр холбогджээ.

ЭНТОНИ РОБИНСОН

АНУ-аас төрөн гарч буй дараагийн од бол Фулхемийн зүүн жигүүрийн хамгаалагч Энтони Робинсон. Өдгөө 27 настай түүнийг Ливерпуль идэвхтэй сонирхож байна. Трент Александр-Арнольдыг Реал Мадрид руу явна гэх шуум дэгдсэн учир түүнийг орыг залгах хүнийг хайгаад эхэлжээ.

МИЛОШ КЕРКЕЗ

Ливерпуль, Манчестер Юнайтед хоёр хоёулаа Борнмутын хамгаалагчийг сонирхож байна. Өдгөө 21 настай, унгар залуу энэ улирал гайхалтай байгаа. Түүний гэрээ 2028 онд дуусах бөгөөд хугацаанаасаа өмнө том баг руу зарагдах нь дамжиггүй биз. Ливерпулийн спортын захирал Ричард Хьюс хуучин Борнмутад ажилладаг байсан. Түүний хувьд Керкезийг Нидерландаас Борнмутад авчирсан хүн. Одоо дахиад Ливерпульд авчрахыг үгүйсгэхгүй.

ЭНТОНИ

2022 оны зун дуулиан шуугиан болж, 80 сая фунтээр Аяаксаас Юнайтедад ирсэн Энтони хөлбөмбөгийн түүхэнд хамгийн бүтэлгүй наймаануудын нэг болж үлдлээ. Өдгөө 24 настай тэрбээр "Улаан чөтгөрүүд"-ийн төлөө 93 тоглолтод 12 гоол оруулжээ. Цалин нь долоо хоногийн 70 мянган фунт учир түүнийг сонирхох багууд олон. Зээлээр ч авах боломжтой. Түүнийг Туркийн багууд сонирхож байгаа гэх мэдээлэл бий.

КРИСТОФЕР НКУНКУ

Челсигийн довтлогч Нкунку Англид ирсэн цагаасаа хойш багийнхаа нэгдүгээр сонголт байж чадсангүй. Эхний улиралдаа бэртлийн улмаас бүрэн тоглож чадаагүй бол одоо Николас Жексоны сэлгээ болчихлоо. Дасгалжуулагч Энцо Мареска ч түүнийг багтаа үлдэж, гарааны эрхийн төлөө тэмц гэдэг зүйлсийг ярьсан. Өдгөө 27 настай тэрбээр энэ улирал Премьер лигт 325 минут тоглож, ердөө хоёр гоол оруулжээ. Түүнийг 2023 онд 52 сая фунтээр Германы РБ Лейпцигээс авчирч байсан билээ. Манчестер Юнайтед Нкункуг сонирхож байна.

ДАНИ ОЛМО

Барселонад жаргалтай байгаа Дани Олмо багаасаа явахаас өөр сонголт үлдсэнгүй гэж ярьж байна. Учир нь Барселонагийн санхүүгийн нөхцөл байдлаас шалтгаалж, Олмог баг нь бүрэлдэхүүндээ үргэлжлүүлэн бүртгүүлж чадахгүй байгаа гэнэ. Хэрэв Барселона санхүүгийн асуудлаа шийдэж чадахгүй бол Олмо чөлөөт агент болно. Түүнийг Премьер лигийн багууд сонирхож байгаа гэх.

БРИАН МБЁМО

Брентфордын супер довтлогч энэ улирал хэдийнэ арван гоол оруулчихсан явна. Гэхдээ түүний гэрээ 18 сарын дараа дуусна. Өдгөө 25 настай түүнийг олон багууд сонирхож байгаа. Бренфорд ч үнэгүй алдахгүйн тул үнэд орсон байгаа дээр нь зарах нь зөв биз. Юнайтед, Арсенал хоёр түүнтэй нэр холбогджээ.

РАНДАЛЬ КОЛО МУАНИ

ПСЖ-ийн 26 настай довтлогч багаа солиход бэлэн байна. 2023 онд 95 сая еврогоор ПСЖ-д ирсэн байсан Коло Муани энэ улирал 14 тоглолтод хоёр гоол оруулжээ. Уг нь Германы Айнтрахт Франкфурт багт 46 тоглолтод 23 гоол оруулж байсан шаггүй довтлогч билээ. Түүнийг Арсенал, Челси, Юнайтедтай холбожээ.

КАЗЕМИРО

Европын хөлбөмбөгт хангалттай өөрийгөө харуулсан Каземиро Саудын Арабыг зорих магадлал өндөр байна. Магадгүй Роналдотой дахин нэгдэж, Азийн хөлбөмбөгт тэсрэлт хийхийг үгүйсгэхгүй.

БЕН ЧИЛВЕЛЛ

Ганган авьяастай, үзүүштэй хөлбөмбөг толилуулдаг Бенийг бэртэл гэмтэл зогсоож, эцэстээ гарааны эрхээ алдаж, сэлгээнд ч үзэгдэхээ болив. Энцо Мареска ч түүнийг шинэ багаа хай гээд хэлчихсэн. Өдгөө 28 настай түүний цалин өндөр бөгөөд Челси ч үнэрхэхгүй зарах шинжтэй.