“Монголын төмөр зам” ТӨХК-ийн гүйцэтгэх захирал Б.Отгонсүхийг чөлөөлж, О.Батчулууныг томилжээ. Дээрх шийдвэрийг тус компанийн Төлөөлөн удирдах зөвлөлөөс гаргасан байна. О.Батчулуун нь эдийн засагч, хуульч мэрэгжилтэй бөгөөд өмнө нь Хууль зүй, дотоод хэргийн яаманд мэргэжилтэн, ахлах мэргэжилтэн, хэлтэс, газрын даргаар ажиллаж байжээ. Мөн “Монголын цахилгаан холбоо” ХХК-ийн Гүйцэтгэх захирал, “Эрдэнэс Монгол” ХХК-ийн Гүйцэтгэх захирлын зөвлөхөөр тус тус ажиллаж байжээ.

Б.Отгонсүх нь Нийслэлийн Засаг даргын орлогч бөгөөд Зам тээврийн асуудал хариуцсан төслүүдийн удирдагчаар ажиллаж байсан юм. Улаанбаатар хот дахь Гаалийн газрын дарга, Замын Үүдийн гаалийн газрын даргын албыг хашиж байсан.

"Монголын төмөр зам" ТӨХК нь төмөр замын дэд бүтцийг барих, эзэмших, ашиглах, төмөр замын тээвэрлэлтийн үйл ажиллагаа эрхлэх, төмөр замын суурь бүтэц, хөдлөх бүрэлдэхүүнийг эзэмших, ашиглах, үйлдвэрлэх, угсрах, түрээслэх, засварлах чиглэлээр үйл ажиллагаа явуулдаг юм.