НЭМЭЛТ:

Өмнөд Солонгосын ерөнхийлөгч Юн Сук Ёлд эрүүгийн хэрэг үүсгэн, баривчлах захирамж гарсан тул өнөөдөр Сөүл хотын төвд орших ерөнхийлөгчийн ордны гадаа жагсаал цуглаан өрнөсөн. Энэ үеэр Солонгосын ерөнхийлөгчийн хамгаалалтын алба болон армийн цэргүүд, иргэд хооронд мөргөлдөөн гарчээ. Эцэст нь маргаантай нөхцөл байдлыг харгалзан үзээд Юныг яг одоогоор баривчлах боломжгүй гэсэн шийдвэр гарсныг Өндөр албан тушаалтнуудын авлигатай тэмцэх газар мэдэгдлээ.

Цугласан олны дунд Юн Сук Ёлын дэмжигчид цөөнгүй байсан. Тэд баривчилгааг амь насаараа дэнчин тавьж зогсоохоо илэрхийлжээ. Мөн зарим нь “Ерөнхийлөгч Юн Сук Ёлыг ард түмэн хамгаална” гэж хашгирч байжээ. Энэ үеэр цагдаа нартай тэмцэхээр даруй 200 гаруй хүн гинжлэн зогссон аж.

Улмаар 13:30 цагийн орчимд баривчилгааг цуцалсан байна. Өндөр албан тушаалтнуудын авлигатай тэмцэх газар уг мэдэгдлээ хийхдээ “Ажилчдынхаа аюулгүй байдалд санаа зовж байгаа тул баривчилгааг цуцалж байна. Мөн Юн Сук Ёл дүрэм журмыг дагаж мөрдөөгүйд гүнээ харамсаж байна” гэжээ. Энэ удаад баривчилгаа цуцлагдсан тул дараагийн алхмуудыг авч үзнэ гэлээ.

Эх сурвалж: REUTERS

ЮН СУК ЁЛЫГ БАРИВЧЛАХ АЖИЛЛАГАА ЭХЛЭВ

Өмнөд Солонгосын “Yonhap” мэдээллийн агентлаг ерөнхийлөгч Юн Сук Ёлыг баривчлах тушаалыг гүйцэтгэхээр хамтарсан мөрдөн байцаах баг ажиллаж байна гэж мэдээлэв. Мөрдөн байцаагчид өнөөдөр /2025.01.03/  өглөө Сөүл хотын ойролцоох оффисоосоо гарч, ерөнхийлөгчийн ордны байр руу хөдөлжээ.

Өмнөд Солонгосын шүүх Юныг бослого зохион байгуулсан хэргээр энэ долоо хоногийн эхээр яллах тогтоол гаргасан юм. Энэ нь арванхоёрдугаар сарын эхээр Юн гэнэтийн дайны онц байдал зарласнаас хойш нэг сарын дараах үйл явдал болж байна. Шүүхийн захирамжийн эцсийн хугацаа Даваа гаригт дуусна.

Юныг дэмжигчид Сөүл дэх ерөнхийлөгчийн ордны гадаа өдөр бүр жагсч, тушаалыг биелүүлэхийг хориглож байна. Тэд мөрдөн байцаагчидтай зөрчилдөж магадгүй гэж ажиглагчид үзэж байна. Тэрбээр өнгөрсөн сард ерөнхийлөгчийн бүрэн эрхээ түдгэлзүүлж, оронд нь түр хугацаанд томилогдсон Хан Дак Суг мөн адил импичмент явуулах санал хураалт явагдсан билээ. Учир нь Үндэсний ассамблейн сөрөг хүчин Хан нь Юнтэй нэг нам учир дайны онц байдал зарласантай холбогдох хууль эрх зүйн асуудлыг санаатайгаар цалгардуулж  байна гэж үзсэн юм.

Pro-Yoon protesters lie on the ground outside of impeached South Korean President Yoon Suk Yeol's official residence as police officers attempt to disperse them, as Yoon faces potential arrest after a court on Tuesday approved a warrant for his arrest, in Seoul, South Korea, January 2, 2025. REUTERS/Kim Hong-Ji

Өмнөд Солонгосын Авлигатай тэмцэх газар (CIO) мэдээлснээр, Юн өөрөө прокурор асан бөгөөд сүүлийн долоо хоногт мөрдөн байцаагчид хамтран ажиллахыг хүссэн гурван удаагийн дуудлагад хариу өгөхөөс татгалзсан байна. Улмаар өнөөдөр олон тооны алба хаагчид Сөүл дэх ерөнхийлөгчийн орныг бүслэн аваад байна.

Гэсэн хэдий ч ерөнхийлөгчийн ордон дотор байрлах цэргийн алба хаагчид Авлигатай тэмцэх газрын мөрдөн байцаагчдын замыг хааж, мөргөлдөөн гаргаж байгаа аж. Шүүхийн захирамжийг гүйцэтгэх багт Авлигатай тэмцэх газрын 30, цагдаагийн 120 албан хаагч багтаж буй.

Тэдний 70 нь ерөнхийлөгчийн ордны гадна талбайд бүслэлтийн байрлал авсан бол үлдсэн нь ордны дотор баривчлах ажиллагааг үргэлжлүүлэхийг хичээж байна.

Ажиглагчдын үзэж буйгаар, өнөөдөр Юныг дэмжигч иргэд болон цэргийн бие бүрэлдэхүүнтэй Авлигатай тэмцэх газар мөргөлдөх боломж бага. Эсрэгээрээ ирэх Бямба, Ням гаригт мөргөлдөөн хурцадмал байдалд хүрч магадгүй аж.