Ардын жүжигчин, дэлхийн шилдэг баритон дуучин Э.Амартүвшин 2025 оны анхны тоглолтоо Италийн алдарт "Ла Скала" театрт Ж.Вердийн "Хувь заяаны хүч" дууриар эхлэх болжээ. Тэрбээр 2024 оны арванхоёрдугаар сарын 18-нд "Риголетто" дуурийн 100 дахь удаагийн тоглолтоо Австри улсын Вена хотод хийсэн юм.

Э.Амартүвшин 2024 оны хоёрдугаар сард Испани улсын Бильбао хотод алдарт "Риголетто" дуурийг 99 дэх удаагаа дуулсан байдаг.

Шилдэг дуурийн дуучин Э.Амартүвшин "Риголетто" дуурийг Монгол, Оросын холбооны улсын Буриад, Герман, Итали, Бельги, Сингапур, Испани, Австрали, Англи зэрэг дэлхийн есөн улсын 26 хотод 100 удаа дуулсан байна.

Тэрбээр 2024 оны гуравдугаар сард Улсын дуурь, бүжгийн эрдмийн театрынхаа 60 жилийн ойд зориулан тоглолтын үеэр мэдээлэхдээ "Би сүүлийн үед Аргентин улсын Буэнос-Айрес хотын сонгодог урлагийн өндөр зэрэглэлийн театрт дуулж үзэхийг боддог болсон. Өөр том театр гэвэл Испани улсын Барселона хотын театр байна. Гэхдээ би ирэх арваннэгдүгээр сард дуулах төлөвлөгөөтэй байгаа. Мөн Испанийн нийслэл Мадрид хотын театрт дуулж үзээгүй. Өөр дэлхийн театр байхгүй. Бүгдэд нь дуулсан" гэдгийг хэлж байв.