ОХУ-ын ерөнхийлөгч Владимир Путин ард иргэддээ хандан шинэ оны мэндчилгээ дэвшүүлэхдээ Украины дайны талаар тодорхой дурдсангүй. Харин оронд нь Оросын ололт амжилтыг өндрөөр үнэлээд, өөрийнх нь 25 жилийн засаглалын хугацаанд хийсэн зүйлээр оросууд бахархах ёстой гэжээ.

Тэрбээр "Эрхэм найз нөхөд минь, төд удалгүй 2025 он гарч, 21 дүгээр зууны эхний улирал дуусах шатандаа орж байна. Бидэнд шийдэх зүйл олон байгаа ч хэдийнэ хийсэн зүйлсээрээ бахархах хэрэгтэй. Өнгөрсөн 25 жилийн хугацаанд цаашдын хөгжлийн замыг зассан" гэжээ.

Түүнчлэн орос цэргүүдийг магтахаа Путин мартсангүй. Өмнөх оны мэндчилгээндээ ч тэр орос цэргүүдийг магтсан билээ. "Шинэ оны өмнөх энэ өдөр Орос даяар сая сая хүмүүс манай дайчид, командлагчидтай хамт байгаа гэдэгт итгэж байна. Шинэ оны босгон дээр бид ирээдүйнхээ талаар бодож байна. Бүх зүйл сайхан болно гэдэгт итгэлтэй байна. Бид зөвхөн урагшлах болно" гэж тэр хэлжээ.

Сонирхуулахад, Борис Ельцин 1999 оныг угтан ард иргэддээ мэндчилгээ дэвшүүлэхдээ ЗХУ-ын дараах үеийн эмх замбараагүй байдлын төлөө уучлалт гуйж, оросуудыг гайхашруулж байжээ. Шинэ жилийн баяраар удирдагч нь үг хэлдэг энэ уламжлалыг ЗХУ-ын удирдагч Леонид Брежнев эхлүүлж байв. Өдгөө энэ нь баярын гол зүйл болж, сая сая айл өрх телевизээр удирдагчийн үгийг үздэг болжээ.