Шинэ оны эхлэл гэдгээс өөрөөр нэгдүгээр сарын 1-ний өдөр дэлхийн түүхэнд ямар онцлог үйл явдлуудаар тэмдэглэгдэн үлдсэн байдгийг түүвэрлэн сонирхуулж байна.

• Гаити улс 1804 оны нэгдүгээр сарын 1-нд Францаас салан тусгаарласнаа тунхаглав.
• АНУ-д 1808 оны нэгдүгээр сарын 1-нд Боол импортлохыг хориглох тухай хууль хүчин төгөлдөр болсон. Ингэснээр боолын худалдаа хууль бус зүйл болсон боловч тус улсад боолчлол үргэлжилсээр байв.
• Дэлхийн хамгийн анхны шинжлэх ухааны зөгнөлт зохиол гэгддэг "Франкенштейн" 1818 оны нэгдүгээр сарын 1-нд хэвлэгдсэн.
• Америкийн нэрт гэрэл зурагчин Альфред Стиглиц 1864 оны нэгдүгээр сарын 1-нд Нью Жерси мужид төржээ. Тэрээр гэрэл зурагчин гэдгээс гадна урлаг дахь модернист хөдөлгөөнийг дэмжигч, урлагийн дилер, хэвлэн нийтлэгч зэргээр олон карьер хөөдөг байв.
• "Хөх тариан талбайд" номын зохиогч Ж.Д.Сэлинжер 1919 оны энэ өдөр Нью-Йоркт төржээ. Энэхүү зохиол нь түүний цорын ганц роман бөгөөд шүүмжлэгчдээс өндөр үнэлгээ авсан байдаг. Өнөөдөр ч энэ зохиолыг дэлхийн олон оронд уншсаар байна.
• Дэлхийн хоёрдугаар дайны үеийн холбоотон 26 улс "Нэгдсэн үндэстний байгууллага" хэмээн өөрсдийгөө тунхаглав. Тунхаг бичигт гарын үсэг зурсан улсууд дайны дараах энхийг сахиулах олон улсын байгууллага байгуулахаа амласан юм.
• Фидель Кастро тэргүүтэй босогчид дэглэмийг нь түлхэн унагасны дараа буюу 1959 оны нэгдүгээр сарын 1-нд дарангуйлагч Фулхенсио Батиста Кубаас зугтжээ.
• Дэлхийн худалдааны байгууллага 1995 оны энэ өдөр албан ёсоор байгуулагджээ. Энэ нь дэлхийн худалдааг хянах, либералчлах зорилгоор байгуулагдсан олон улсын байгууллага юм.
• Европын холбооны мөнгөний нэгж еврог 2002 оны нэгдүгээр сарын 1-ний өдөр худалдаанд нэвтрүүлжээ. Улмаар мөн оныхоо гуравдугаар сар гэхэд евро нь гишүүн орнуудын цорын ганц хууль ёсны төлбөрийн хэрэгсэл болсон байна.