Монгол Улсын хэмжээнд 1.160.000 гаруй тээврийн хэрэгсэл бүртгэлтэй байгаагаас Нийслэл хотын хэмжээнд 804,000 тээврийн хэрэгсэл бүртгэлтэй байна.Үүнээс өдөр тутамд 480.000-500.000 орчим тээврийн хэрэгсэл гудамж замын хөдөлгөөнд оролцож байна. Төвлөрлийн бүс буюу их тойруу дотор их дээд сургууль, цэцэрлэг болон иргэдэд үйлчлэх томоохон зорчилт хөдөлгөөн ихтэй төр захиргааны байр, сургууль цэцэрлэг, их дээд сургууль, үзвэр үйлчилгээний томоохон байгууллагууд үйл ажиллагаа явуулдаг.

Хан-Уул дүүргийн 3-р хороо, Механик, тээврийн сургуулийн уулзвар нь Энхтайваны өргөн чөлөө, Нарны зам, Залуучуудын гудамж, Их тойрууг Чингисийн өргөн чөлөөтэй холбосон хотын төврүү орох гарах хөдөлгөөний ачаалалд нөлөөлдөг томоохон уулзваруудын нэг юм.

Механик тээврийн сургуулийн уулзварын хойд талаас цагт дунджаар 2351 тээврийн хэрэгсэл нэвтэрч байгаагаас 194 буюу 8.3 хувь нь баруун, 829 буюу 35.3 хувь нь чигээрээ, 543 буюу 23.1 хувь нь зүүн, 785 буюу 33.4 хувь нь буцаж эргэх үйлдэл хийж байна.

Харин зүүн болон буцаж эргэх үйлдэл хийж байгаа 56.5 хувь буюу 1328 тээврийн хэрэгсэл нь тухайн уулзварын гэрлэн дохионы зохицуулалтын горимоос давсан хугацаа шаардаж байгаагаас Өгөөж, Баруун 4 зам, Бөмбөгөр, Хүнсний 1-р дэлгүүр, Гэсэр сүмийн уузварын нэвтрүүлэх чадварыг бууруулж, улмаар Энхтайваны өргөн чөлөө, Нарны зам, Залуучуудын гудамжаар дамжин хотын төвөөс урагшаа Хан-Уул дүүрэг рүү зорчих хөдөлгөөнийг удаашруулдаг.

Иймд 2025 оны 01 дүгээр сарын 06-ны өдрөөс тухайн уулзварын хөдөлгөөний ачааллыг тэнцвэржүүлэх зорилгоор хөдөлгөөн зохион  байгуулалт өөрчлөлт оруулахаар төлөвлөөд байна.

Тухайлбал, өмнө нь Нарны хорооллоос баруун чиглэлд Нарны гүүрэн доогуур зорчиж байсан хөдөлгөөнийг баруунаас зүүн чиглэлд нэг чигийн болгон өөрчилж, Нарны хорооллоос гарахдаа зүүн гар тийш буюу урагш эргэж Нарын гүүр лүү нийлж хотын төврүү орох, хотын төвөөс нарны гүүрийг давж баруун эргэж гүүрэн доогуур зорчин Нарны хороолол орохоор, Алтай хотхоны оршин суугчдын тээврийн хэрэгслүүд төв замруу нийлэхгүйгээр хойд чиглэлд “Туушин”-гийн урдуур явж мөн Нарны гүүрэн доогуур гарч гүүрний зүүн талаас Нарын гүүртэй нийлж хотын төврүү зорчих (гурвалжингийн гүүр болон “Вагнер ази” компанийн урдах замаар зорчих тээврийн хэрэгсэл мөн) -оор хөдөлгөөнийг зохион байгуулахаар төлөвлөсөн.

Дээрх хөдөлгөөн зохион байгуулалттай холбоотой Алтай, Нарны хотхон (хороолол) доторх хөдөлгөөнд ямар нэгэн өөрчлөлт орохгүй бөгөөд хөдөлгөөний ачааллыг тэнцвэржүүлэх зорилгоор дунд голын замын зүүн талын гүүрнээс баруун талын гүүр хүртэлх замыг зүүнээс баруун чиглэлд нэг чигийн хөдөлгөөнөөр мөн зүүн талын гүүрийг урдаасаа хойд чиглэлд, баруун талын гүүрийг хойноосоо урд чиглэлд нэг чигийн хөдөлгөөнд оруулж  хөдөлгөөнийг зохион байгуулах юм.

Хөдөлгөөн зохион байгуулалттай холбоотой нийтийн тээврийн хэрэгслийн чиглэлд дараах байдлаар өөрчлөлт оруулна.

Өнөөдрийн байдлаар Улаанбаатар хотод 124 чиглэлд 1133 тээврийн хэрэгсэл иргэдэд нийтийн тээврийн үйлчилгээг хүргэн ажиллаж байна. Нарны гүүрээр нийтийн тээврийн үйлчилгээний 5 чиглэлийн 45 тээврийн хэрэгсэл дамжин өнгөрдөг. Тухайн авто замын чиглэлийн өөрчлөлтийн хүрээнд Нарны гүүрэн доогуур тойрох хөдөлгөөн хийдэг Ч:61 Офицеруудын ордон – ТЭЦ 3 чиглэлийн замналд өөрчлөлт орж дунд голын замаас Механик тээврийн уулзвараар эгц нэвтрүүлэхээр маршрутыг төлөвлөсөн. Тухайн Ч:61 чиглэлийн хувьд өдөрт 11 тээврийн хэрэгслээр 10 минутын хүлээгдлийн хугацаатай иргэдэд үйлчилгээ үзүүлдэг. Уг төлөвлөлт хийгдсэнээр уулзваруудын нэвтрүүлэх хурд ихсэж зогсоол дээрх автобус хоорондын хүлээгдлийн хугацаа багасах боломжтой байна.