Байгаль орчин, уур амьсгалын өөрчлөлтийн сайд С.Одонтуяа, Нийслэлийн агаар орчны бохирдолтой тэмцэх газрын дарга Д.Мөнхбаатар нар өнөөдөр /2024.12.30/ агаарын бохирдлыг бууруулах чиглэлээр ойрын хугацаанд хийж хэрэгжүүлж буй ажлын талаар мэдээлэл хийлээ.

Байгаль орчин уур амьсгалын өөрчлөлтийн сайд С.Одонтуяа:

-Улаанбаатар хотын хэмжээнд өнөөдрийн байдлаар аж ахуй нэгжүүд 150 мянга орчим түүхий нүүрс түлж, агаар бохирдуулж байна. 150 мянган тонн түүхий нүүрсийг жилд түлнэ гэдэг нь 100-гаад мянган өрх түүхий нүүрс түлсэнтэй тэнцэж байна. Энэ байгууллагуудын асуудлыг нэн тэргүүнд шийдвэрлэхээр боллоо. Сэтгэцийн эрүүл мэндийн үндэсний төв нь одоог хүртэл 1960-аад онд ашиглаж байсан зуухыг ашигладаг. Гар ажиллагаатай бөгөөд түүхий нүүрс түлдэг. Энэ төвийг төвийн дулааны нэгдсэн шугамд нэн яаралтай холбохоор шийдвэрлэлээ. Чингэлтэй дүүргийн хэмжээнд сургууль, цэцэрлэгийг дулаанаар хангадаг уурын зуухууд байдаг. Эдгээрийг газанд шилжүүлэх.

БНХАУ агаарын бохирдлоо бууруулсан туршлагыг судалж, мэргэжилтэн урьж авч ирэх ажлыг хийх гэж байна.

Нано технологийг түлшинд хольсноор утаа буурдаг, хоруу чанар нь багасдаг. Түлшийг шинжилгээнд өгсөн, хүний эрүүл мэндэд хоргүй гэдэг дүгнэлт гарсны дараа туршилт хийнэ.

“Эрдэнэс Тавантолгой” ХК-ийн 0 давхаргын нүүрсийг түлшинд ашиглахаар ярьж байгаа. Одоо хэрэглэж байгаа сайжруулсан шахмал түлшийг 2025 оны гуравдугаар сарын 1-нээс хойш хэрэглэхгүй байх зорилт тавиад ажиллаж байна гэлээ.

Нийслэлийн агаар орчны бохирдолтой тэмцэх газрын дарга Д.Мөнхбаатар:

-Агаар орчны бохирдлыг бууруулах чиглэлээр хуулийн төсөл боловсруулж байна. Утаагүй эсвэл яндангүй бүс гэдгийг тодорхой оруулж өгье гээд ажиллаж байна. 2025 онд Яндангүй бүсэд харьяалагдаж байгаа газруудад гэр эсвэл байшинд гал түлэхийг хориглоно. Улаанбаатар хотод  байгалийн шингэрүүлсэн хий нэвтрүүлнэ. 40  мянган айлыг шингэрүүлсэн хийд холбохоор ажиллаж байна.

Үүнд, барилгажсан дүүрэг хороод орно.

Драгон төвийн хойноос эхлээд III, IV хорооллын хойд талын дэнж, Гандан, 32 -ын тойргийг эхний ээлжинд яндангүй бүсэд хамруулахаар төлөвлөөд явж байна. 40 мянган айлыг хийд холбоно. Зарим яндангүй бүсэд хамаарч байгаа өрхийг керосинд шилжүүлэхээр судалгаа хийгээд явж байна.

Баянхошуу, Шар хад дэд төвийн хүрээнд ирэх онд 520 айл, гэр хорооллын дахин төлөвлөлтийн хүрээнд 3858, нийт 4378 айл орон сууцанд орохоор байна.

Нийслэлийн хэмжээнд 95 мянган монгол гэрт иргэд амьдарч байгаа. Эдгээр айл өрхүүдээс 32 мянган айлын зуухыг давхар шаталттай зуухаар хангана. Тендертээ энэ шаардлагыг тавьсан.

Мөн 95 мянган айлын гэрийг дулаална. Төр, хувийн хэвшлийн хамтын ажиллагааны хүрээнд энэ ажлыг хийнэ.

Сайдын хэлсэнчлэн түүхий нүүрс хэрэглэж байгаа уурын зуухуудыг ирэх 2025 онд газ руу эсвэл цахилгаанаар холбох боломжит хувилбар луу шилжүүлэх зорилт тавьсан.

2666 нам даралтын зуух байгаа. нам даралтын зуухыг бусад төрлийн эрчим хүч рүү шилжүүл гэдэг үүрэг өгсөн.

“Тавантолгой түлш” компанийн түүхий эдийг солихоор тооцоо судалгаа хийгээд явж байна. Хөх нүүрс буюу хагас коксоор солих. “Эрдэнэс Тавантолгой” компанийн 0 давхаргын нүүрсийг угааж баяжуулаад сайжруулсан түлшнийхээ түүхий эдээр сольъё гэпэг байдлаар судалгаа хийгээд явж байна. Холбогдох лабораторид дээжийг хүргүүлсэн.  Ойрын өдрүүдэд хариу нь гарна. ТЭЦ-2, 3, Амгалан дулааны станцын шүүлтүүрийг шинэчилнэ” гэлээ.