Кристиано Роналдо хуучин клуб болох Реал Мадрид болон сүүлийн үед тааруу байгаа Манчестер Сити хоёрыг удахгүй эргэн топ түвшинд гарна гэдэгт итгэж байна. Саяхан Дубайд болсон "Globe Soccer" арга хэмжээний үеэр Роналдо ярихдаа "Багуудад уналт, босолтын үе гэж байдаг. Одоо уналтын үе нь тохиож байна. Гэхдээ Реал Мадрид, Манчестер Сити хоёрыг удахгүй эргэн ирнэ гэдэгт 100 хувь итгэлтэй байна" гэжээ.

Сэтгүүлч түүнээс Ситигийн тоглогч байсан бол хувцас солих өрөөнд юу хэлж, хийх байсан гэж асуухад Роналдо "Бага ярьж, үйлдлээрээ ихийг харуулна. Үүнийг л би хийнэ. Зарим залуусыг тусад нь шахаж, юу бодож байгаагаа хэлнэ. Хүн бүхний өмнө хэлээд байх шаардлагагүй. Том баг, том тоглогчид юу болохгүй байгааг мэдрэх хангалттай ухаантай байдаг гэж би боддог. Гвардиола бол үнэхээр ухаалаг дасгалжуулагч. Тэр асуудал юунаас үүсээд байгааг мэдэж байгаа" гэлээ.

Харин түүний хувьд Реал Мадрид муугүй улирлыг өнгөрүүлж байгаа аж. Тэрбээр "Яагаад хүмүүс Реал Мадридыг энэ улирал муу байна гэж хэлээд байгаа юм. Хэрэв УЕФА Аваргуудын лигт түрүүлэх багийг сонгоод мөрий тавь гэвэл би Реал Мадридыг сонгоно. Учир нь хэн ч юу болохыг таахгүй. Мөн Реал Мадрын цэнгэлдэх Сантъяго Бернабеуд цаг өөрөөр явдаг.  Бүх баг тэнд тоглохоос эмээдэг. Энэ бол үнэн. Түүх үүнийг гэрчилнэ. Реад Мадридыг дуусчихлаа гэж бодож болохгүй. Тэд үргэлж эргэн ирдэг" гэв.

Түүнийг ирээдүйд баг эзэмших уу гэж асуухад "Би одоо ч залуухан байна. Надад төлөвлөгөө, мөрөөдөл бий. Гэхдээ миний үгийг тогтоогоорой. Би том клубын эзэн болно" гэж харилжээ.