ХХААХҮЯ-ны Бодлого төлөвлөлтийн хэлтсийн дарга Ц.Болорчулуун цаг үеийн асуудлаар мэдээлэл өгөв.

-ХХААХҮЯ-ны Бодлого төлөвлөлтийн хэлтсийн дарга  Ц.Болорчулуун:

-Мах импортлогч тал хэдхэн зүйлийг шаарддаг. Тухайлбал, махан дээр жилийн турш нийлүүлээч гэдэг саналыг хэлдэг. Харин бидний хувьд уг саналыг хараахан биелүүлж чадахгүй байна. Зөвхөн өвөл малаа нядалгаанд оруулж тэр махаа хадгалж байгаад экспортолж байна. Махаа жилийн турш бэлтгэн нийлүүлэхийн тулд эрчимжсэн мал аж ахуй фермерүүдийг бий болгох шаардлагатай байна. Ингэснээр улирал хамаарахгүй махаа экспортлох боломж бүрдэнэ. Хөдөө аж ахуйн салбар эрсдэлд өртөх магадлал өндөр салбар.

Эрсдэлээс урьдчилан сэргийлэхийн тулд уламжлалт мал ахуйг эрчимжүүлэх, малчдыг хоршуулах нэгтгэх нь эрсдэлээс сэргийлэх алхам гэж харж байгаа.

Тэр ч үүднээс "Шинэ хоршоо" хөдөлгөөнийг эхлүүлсэн. Ингэснээр малчид нэгдэж тодорхой хэмжээгээр эрсдэлээс сэргийлэх боломж бүрдсэн. Тухайлбал, хашаа хороогоо хамтарч янзлах, хадлан тэжээлээ нэгдэж бэлтгэх гэх мэт. Ингэснээр хөрөнгө оруулалтын эх үүсвэрийг нь шийдээд өгчихвөл малчид эрсдэлийг даван туулахад дөхөм болно.

Дээрээс нь даатгалын тогтолцоог боловсронгуй болгож, мал аж ахуйн болон тариалангийн салбарт даатгалыг сайжруулснаар мөн эрсдэлээс сэргийлэх боломжтой.

Боловсруулах үйлдвэрийн үе шатыг нэмэгдүүлэх, боловсронгуй болгох зорилгоор “Цагаан алт” хөтөлбөрийг хэрэгжүүлж байгаа. Энэ хүрээнд эргэлтийн хөрөнгийн зээл авах боломжийг бүрдүүлж өнгөрсөн долоо хоногт арилжааны 10 банктай санхүүжилтийн зээлийн гэрээ байгуулсан байгаа. Хөнгөн үйлдвэрийн тухай хуулийг он гараад УИХ-д өргөн барина” гэлээ.