НЭМЭЛТ: 

Засгийн газрын өнөөдрийн ээлжит бус хуралдаанаар хэлэлцэн шийдвэрлэсэн асуудлын талаар Шадар сайд С.Амарсайхан, Аж үйлдвэр, эрдэс баялгийн сайд Ц.Туваан, Уур амьсгалын өөрчлөлт, байгаль орчны сайд С.Одонтуяа нар мэдээлэл хийлээ.

Уур амьсгалын өөрчлөлт, байгаль орчны сайд С.Одонтуяа:

-Агаар орчны бохирдлыг бууруулах үндэсний хороо хуралдаж ойрын хугацаанд хэлэлцэх асуудлуудыг хэлэлцэж салбар яамдууд холбогдох газруудад үүрэг даалгавар өгсөн. Үүрэг даалгаврын биелэлтийг өнөөдрийн Засгийн газрын хуралдаанаар хэлэлцлээ. Баяр ёслолын үеэр бүгд өндөржүүлсэн бэлэн байдалд ажиллана. Агаарын бохирдлыг бууруулах асуудалд цоо шинэ реформ хэрэгжүүлэхийг зорьж байна. Хуучин асуудлыг хуучин үед нь орхино. Шинэ стандарт мөрдүүлж, шинэ түлш хэрэглэхийг зорьж байна. Тооноос илүү чанарын реформ хийх асуудлыг танилцууллаа. Агаарын бохирдлыг бууруулах чиглэлээр эрдэмтэн, судлаачид, салбарын мэргэжилтнүүдээс олон санал ирж байгаа учраас саналыг эрэмбэлэх ажлыг Хот байгуулалт, барилга, орон сууцжуулалтын  яам хариуцан ажиллахаар болсон. Бид 30 жилийн алдаагаа давтахгүй байхыг хичээж байна. Агаарын бохирдлыг бууруулах чиглэлд олон төсөл хөтөлбөр, арга зам хэрэгжүүлж, олон тэрбум төгрөг зарцуулсан боловч зарим нь үр дүн өгөхгүй байгаа учраас алдааг давтахгүйн тулд мэргэжлийн хүмүүстэй хамтарч ажиллана.

Сайжруулсан түлш, гадаад болон дотоодын агаарын стандартыг шинэчлэх ажил хийж байна. Бусад оронд хэрэглэж байгаа шинэ технологийг турших үеэр "Тавантолгой түлш" компани дээр Засгийн газрын гишүүд очиж танилцахаар болсон. Агаарын бохирдлын 20 хувийг үүсгэж, түүхий нүүрс хэрэглэж байгаа 40 гаруй ахуйн нэгжийн асуудлыг яаралтай шийдэх үүргийг өнөөдөр өглөө. Мөн агаарын бохирдлын 20 гаруй хувийг үүсгэж байгаа автомашины асуудлыг шийдэх үүргийг Аж үйлдвэр, эрдэс баялгийн яаманд өгсөн. Евро-5 стандартын түлш рүү шилжих, татварын ямар бодлого баримтлах вэ гэдэг чиглэлээр шат дараатай арга хэмжээ авахаар болсон.

Аж үйлдвэр, эрдэс баялгийн сайд Ц.Туваан:

-Засгийн газраас хэрэгжүүлэхээр зорьж байгаа 14 мега төслөөс гурав нь хэрэгжих шатандаа шийдвэрүүд гарсан байна. Нэгдүгээрт, Эрдэнэбүрэнгийн усан цахилгаан станцын санхүүжилт болон гэрээний асуудал шийдэгдэж ажлууд нь эхлээд байна. Хоёрдугаарт, Гашуунсухайт-Ганцмод хил холболтын төмөр замын асуудлаар Засгийн газар хооронд хийх хэлэлцээрт орох асуудлаар УИХ-ын тогтоол гарсан. Энэ асуудал  шийдэгдсэнээр цаашаа Шивээхүрэн, Сэхэ, Ханги мандал, Бичигт, Зүүн хатавч зэрэг боомтуудын төмөр замын асуудлууд болон мөн БНХАУ-д хийгдэх хөрөнгө оруулалт болон бүтээн байгуулалтын бусад асуудлууд цааш үргэлжлэх ажлууд шийдлийн шатанд орлоо.  Гуравдугаарт, уул уурхайн салбар тэр дундаа цөмийн ашигт малтмалын салбарт Францын "Орано" компанитай хийх хөрөнгө оруулалтын гэрээний асуудал шийдэгдэж, УИХ болон Байнгын хороодын хуралдаанаар орж эхний хэлэлцүүлгүүдээ хийж байна. Мөн он дамнаад яригдаж байгаа асуудал бол Газрын тос боловсруулах үйлдвэр болон бусад үйлдвэрүүдийн газрын тос боловсруулах ажил яригдаж байна. БНЭУ-аас санхүүжих 450 сая.ам доллартай холбоотой асуудлаар хоёр улсын Засгийн газар хоорондоо зөвшөөрлийн бичиг ирүүлсэн. Энэ бол зээл. Тийм учраас УИХ-аар ирэх оны эхний өдрүүдэд уг зээлийн хэлэлцээр соёрхон батлагдах хүлээлттэй байна гэлээ.

Засгийн газар өнөөдөр /2024.12.30/-нд ээлжит хуралдаанаа 11:00 цагт хийхээр тогтжээ. Өнөөдрийн хуралдаанаар Хөгжлийн банкны үйл ажиллагаа холбогдох хууль тогтоомжид нийцэж байгаа эсэх тухай ээлжит хяналт, шалгалт хийсэн дүнгийн талаар, Нийслэлийн агаарын бохирдлын талаар, 2025 оныг Нийслэлийн дэд бүтцийн хөгжлийг дэмжих жил болгон зарласантай холбогдуулан авах арга хэмжээний талаар,“Хоолны түүхий эдийн зардлыг шинэчлэн тогтоох тухай” зэрэг найман асуудал хэлэлцэж, холбогдох сайд нар мэдээлэл хийлээ.