Цахим спортын "CS2" төрлийн шинэ улирал он гараад удахгүй эхэлнэ. Үүнтэй холбогдуулан багууд ч шилжилт хөдөлгөөнийг идэвхтэй хийж, бэлтгэл ажлаа хангаж буй. Том багууд ч эрс өөрчлөлтийг хийж байх шиг. Та бүхэндээ өнөөдрийн байдлаар хийгдсэн солилцоо, наймаануудыг танилцуулъя.

• Оросын "Virtus.pro" баг Шанхайн Мэйжорын дараа "Jame", "n0rb3r7" хоёрыг сэлгээ рүү шилжүүлж, ерөнхийдөө ашиглахгүй гэдгээ мэдэгдчихсэн. Тэгвэл тэднийг орлохоор "FL4MUS" буюу Тимур Марев болон Кайсар Файзнуров буюу "ICY" нарыг авчирч байна.
• Саудын Арабын "Falcons" баг шинэ бүрэлдэхүүнээ бүрэлдүүлсээр байна. Тэд "HEROIC"-ийн гурвал болох "kyxsan", "TeSeS", "degster" нарыг элсүүлэхээр идэвхтэй ярилцаж байна. Одоогоор "Falcons"-ийн бүрэлдэхүүнд "Niko", "Magisk" хоёр л байгаа аж.

• Гэнэтийн байдлаар "ropz"-ийг Францын "Vitality" руу алдсан "FaZe" өөрчлөлт рүүгээ орж байх шиг. Тэд "Complexity"-ээс Жонатан Яблоновски буюу "EliGe"-ийг авахаар ажиллаж байна. "EliGe" өөрөө ч Европын багт тоглож үзмээр байгаагаа дурдсан билээ.
• Израиль залуу Гая Илуз буюу "NertZ" ирэх жил "Liquid"-д тоглоно. "HEROIC" ч түүнийг үлдээх гэж хүчилсэнгүй. Дашрамд дурдахад, "HEROIC" баг энэ жил тоглогчдын солилцоо, наймаанаас 10 сая ам.долларын ашиг олсон аж.
• "Niko"-г "Falcons" руу үдсэн Германы "G2" баг түүнийг орлуулах хүнээ олжээ. Тодруулбал, "Cloud9"-ээс Никита Мартыненко буюу "HeavyGod"-ийг элсүүлэхээр эрчимтэй хөөцөлдөж байна. Эх сурвалжуудын мэдээлснээр "Cloud9" байгууллага "CS2" багаа тарааж байгаа гэх.

• "NertZ"-ийг авчирсан "Liquid" баг "YEKINDAR"-ийг сэлгээ рүү шилжүүлжээ. Түүний дараагийн баг хаана вэ гэдэг сонирхол татаж байна.
• Ази багуудын хувьд тун чимээгүй байгаа. Сүүлд Хятадын "Lynn Vision" баг "TYLOO"-аас Лижи И буюу "Starry"-ийг эргүүлэн авчээ. Өдгөө 19 настай тэрбээр 2021-2024 оны хооронд "LVG"-д тоглож байсан түүхтэй.