Финланд, Эстонийг холбосон "Estlink 2" цахилгааны кабель болон өөр бусад хэд хэдэн харилцаа холбооны кабель тасарсан хэрэг Лхагва гаригт гарсан. Украины дайны улмаас бүс нутаг өндөржүүлсэн бэлэн байдалд шилжээд багагүй хугацаа өнгөрч буй. Гэвч энэ хэрэг гарснаар бүс нутаг дахь цэргийн оролцоог улам нэмэгдүүлэх шаардлагатай гэсэн дүгнэлтэд хүрч байна.

Тэгвэл далай доогуурх цахилгаан болон интернетийн каблеийг тасалсан байж болзошгүй "Eagle S" газрын тос тээвэрлэгч хөлөг онгоцыг Финланд хураан авчээ. Энэ онгоцыг Оросын сүүдрийн флотын нэг хэсэг байж магадгүй гэж таамаглаж байна. Сүүдрийн флот гэдэг нь барууны хориг арга хэмжээг даван туулах зорилготой хөлөг онгоцуудыг хэлнэ.

Кабелиуд тасарсан ч гэлээ Финландын эрчим хүч, харилцаа холбооны үйлчилгээ тогтвортой, хэвийн байгааг мэдэгджээ. Харин Эстони улс энэ хэрэгтэй холбоотойгоор "Estlink 2" бүсэд тэнгисийн цэргийн флотоо байрлуулна гэв.

"Eagle S" онгоцыг Финландын булан дахь кабель таслах ажиллагаанд оролцсон эсэхийг тогтоох шалгалтын ажиллагаа явагдаж байна. Цагдаа нар хөлгийн багийн гишүүдтэй ярилцаж, нотлох баримт цуглуулж байгаа аж.

Далайн гүний амин чухал кабелийг таслахад сүүдрийн флотыг ашиглах нь Украины дайны улмаас өндөржүүлсэн бэлэн байдалд байгаа бүс нутагт томоохон хурцадмал байдлыг илтгэнэ.