НАСА-ийн "Parker Solar Probe" хөлөг наранд урьд өмнө байгаагүйгээр ойртож, түүх бүтээжээ. Аяллын үеэр сансрын хөлөг хэдэн өдрийн турш холбоо тасарсан боловч орон нутгийн цагаар Баасан гаригийн 05:00 цагийн үед дохио илгээсэн байна. Нарны гадаргуугаас 6.1 сая км зайд очсон "Parker Solar Probe" аюулгүй бөгөөд хэвийн ажиллаж байсныг НАСА мэдэгдлээ.

НАСА-гийн цахим хуудсанд мэдээлснээр сансрын хөлөг 692 мянган км/цаг хүртэл хурдалж, цельсийн 980 хэм хүртэлх халууныг тэсвэрлэжээ.

Нарыг ойрын зайнаас судлах энэ судалгаагаар дамжуулан тухайн бүсд орсон материал хэрхэн хэдэн сая хэм хүртэл халдагийг илүү сайн ойлгоход туслах хэмжилт хийхээс эхлээд олон талын мэдээллийг олж авна. Энэ талаар НАСА-гийн эрдэмтэн Никола Фокс хэлэхдээ "Хүмүүс олон зууны турш нарыг судалсаар ирсэн. Гэхдээ тэнд очиж үзэхээс нааш уур амьсгалыг нь мэдрэнэ гэж байхгүй" гэсэн юм.

"Parker Solar Probe" хөлөг нь наранд улам ойртох НАСА-гийн төлөвлөгөөний нэг хэсэг болж 2018 оноос нарны аймгийн төв рүү чиглэж эхэлжээ. Энэ хугацаанд нарны хажуугаар 21 удаа өнгөрч, улам бүр ойртсоор байсан юм. Эцэст нь энэ удаад дээд амжилт тогтоожээ.

6.1 сая км зай гэдэг тийм ч ойрхон сонсогдохгүй байж магадгүй. Гэхдээ бид нарнаас 149.7 сая км зайд оршдог гэдгийг санах хэрэгтэй.

Дашрамд дурдахад, "Parker Solar Probe" хөлөг цельсийн 1400 хэм болон электроникийг эвдэж болзошгүй цацрагийг тэсвэрлэдэг. Энэ нь 11.5 см зузаантай нүүрстөрөгчийн нийлмэл бамбайгаар хамгаалагдсан хөлөг юм. Мөн 692 мянган км/цаг хүртэл хурдалсан гэдэг нь Лондонгоос Нью-Йорк хүрэх замыг 30 секунд хүрэхгүй хугацаанд туулсан гэсэн үг ажээ.