Улиран одож буй 2024 онд спортын ертөнцөд өрнөсөн онцлох таван үйл явдлыг “NEWS” агентлаг онцлон нэрлэсэн.  Тэгвэл Парисын паралимпод таеквондогийн төрөлд У.Сүрэнжав алтан медаль хүртэж, Парисын тэнгэрт эх орныхоо далбааг мандуулсан үйл явдлыг энэ оны спортын онцлох таван үйл явдлын нэгээр нэрлэж байна.

Парисын паралимпод Монголын баг тамирчид медалийн хур буулгасан. Нийт 170 орны 4,463 тамирчин спортын 22 төрлөөр 549 багц медалийн төлөө өрсөлдсөн бөгөөд монголчууд 12 тамирчнаа илгээж, дөрвөн медаль хүртжээ. Тухайлбал, таеквондогийн төрөлд У.Сүрэнжав алт, Г.Болор-Эрдэнэ мөнгө, хөнгөн атлетикийн бөөрөнцөг шидэлтийн төрөлд Ц.Баттулга мөнгө, пауэрлифтингийн төрөлд Э.Содномпилжээ мөнгөн медалийн эзэд болов.

Э.Содномпилжээ гурван паралимпийн наадмаас медаль хүртсэн Монголын анхны тамирчин болсон төдийгүй дэлхийд ховор тооцогдох амжилтыг үзүүлжээ. Тэрбээр Риогийн наадмаас алт, Токиогоос хүрэл медаль хүртэж байлаа.

Хамгийн гайхалтай үйл явдал нь Монгол Улс түүхэндээ анх удаагаа паралимпийн эмэгтэй аваргатай болсон юм. Өмнө нь олимп болон паралимпоос алтан медаль хүртэж байсан эмэгтэй тамирчин үгүй. Таеквондогийн эмэгтэйчүүдийн -52 кг-д өрсөлдсөн У.Сүрэнжав нь наадмын турш Египет, Мексикийн тамирчдыг ялж, алтан медалийн төлөөх тулаанд Ираны Зара Рахимиг 5-2 гэсэн харьцаатай буулган авчээ.

Энэ жил 24 настай У.Сүрэнжав 2024 оны Европын аваргад түрүүлж, дэлхийн чансаагаараа паралимпийн эрхээ авсан.