Украины арми анх удаа хойд солонгос цэрэг олзолсон тухай Өмнөдийн тагнуулын агентлаг өнөөдөр /2024.12.27/ мэдээллээ. Шархадсан хойд солонгос цэргийг харуулсан гэрэл зураг телеграмд цацагдсаны дараа уг мэдээлэл гарчээ. Цэргийн биеийн байдлын талаар тодорхой мэдээлэл одоогоор алга байна.

Өмнөдийн Үндэсний тагнуулын алба энэ талаар мэдэгдэл хийхдээ "Холбоотон улсын тагнуулын байгууллагатай бодит цаг хугацаанд мэдээлэл солилцсоноор нэг цэрэг олзлогдсон нь батлагдсан" гэжээ.

Хойд Солонгос, Орос улсууд харилцан батлан хамгаалах гэрээнд гарын үсэг зурснаас хойш удалгүй Пёньянаас 11 мянга орчим цэрэг Украинд илгээсэн. Хойд Солонгос цэргүүд бэлтгэл муутай байсны зэрэгцээ танил бус нутаг дэвсгэрт очсон тул аюулд өртөмтгий байгаа аж. Тэднийг Курск орчмын тулаанд их хэмжээний хохирол амссан тухай Украины тагнуулын агентлаг мэдээлээд буй. Түүнчлэн Новоивановка орчимд Хойд Солонгосын анги нэгтгэлүүд ихээхэн хохирол амсчээ. Байлдааны туршлагаас гадна тэдэнд ундны усны хомсдол зэрэг ахуйн асуудал ч үүсээд буй аж.

Украины ерөнхийлөгч Зеленскийн мэдээлж буйгаар Курск мужид Хойд Солонгосын 3000 гаруй цэрэг алагдаж, шархдаад байна. Мөн ОХУ, Хойд Солонгосын хамтын ажиллагаа нь Солонгосын хойгийг тойрсон тогтворгүй байдлын эрсдэлийг нэмэгдүүлж буйг тэр онцолсон юм.