Азербайжаны агаарын тээврийн "J2-8243" онгоц Казахстанд осолдож, 38 хүний амь үрэгдсэн харамсалтай хэрэг Лхагва гаригт гарсан. Онгоцны ослын шалтгааныг ОХУ-тай холбосон таамаглалууд хэвлэлээр гарсан тул Кремль анхааруулга хүргүүлжээ. Тодруулбал, агаарын тээврийн зарим мэргэжилтэн Азербайжаны онгоцыг Чеченийн нутаг дэвгэрт агаарын довтолгооноос хамгаалах системд өртсөн гэж таамаглажээ. Түүнчлэн Азербайжаны зарим хэвлэлд онгоцны ослыг Оросын пуужинтай холбоотой гэж мэдээлсэн байна.

Ослын дараахан Оросын төрийн хяналтад байдаг телевиз мэдээлэл өгөхдөө "Ослын шалтгаан нь сүрэг шувууны дайралт байх магадлалтай" гэсэн юм.

Онгоц Казахстаны Актау хотын ойролцоо буухаасаа өмнө Чечениэс баруун Казахстан руу Каспийн тэнгисээр дамжин нисчээ.

Азербайжан улс Пүрэв гаригт амь үрэгдэгсдийн дурсгалыг хүндэтгэж, үндэсний гашуудлын өдрийг тэмдэглэжээ. Тус улсын ерөнхийлөгч Илхам Алиев хэлэхдээ "Энэ бол Азербайжаны ард түмний хувьд хэмжээлшгүй эмгэнэл" гэсэн юм.

Харин Кремлийн хэвлэлийн төлөөлөгч Дмитрий Песков "Мөрдөн байцаалтын дүгнэлт гарахаас өмнө ямар нэгэн таамаг дэвшүүлэх нь буруу. Мэдээжийн хэрэг бид ийм зүйл хийхгүй. Хэн ч ийм юм хийж болохгүй. Мөрдөн байцаалтын ажиллагаа дуустал хүлээх хэрэгтэй" гэжээ.

Нисэхийн шинжээчдийн хэлж буйгаар ослын шалтгаан нь агаарын довтолгооноос хамгаалах системтэй холбоотой байх магадлал өндөр аж. Тухайлбал, нисэхийн шинжээч Ричард Абулафиа хэлэхдээ "Онгоц удирдлагаа алдаж болно. Гэлээ гээд замаасаа ийм огцом хазайхгүй" гэжээ. Харин "Sibylline" эрсдэлийн зөвлөх компанийн шинжээч Жастин Крамп хэлэхдээ "Онгоцны дотор болон гадна талын гэмтэлийг харахад Грозный хотод ажиллаж байгаа Оросын агаарын довтолгооноос хамгаалах системтэй холбоотой байж болзошгүй" гэжээ.

Азербайжаны засгийн газрыг дэмжигч "AnewZ" суваг Пүрэв гаригийн орой мэдээлэхдээ "Урьдчилсан мөрдөн байцаалтын явцад онгоц Оросын ‘Pantsir-S’ агаарын довтолгооноос хамгаалах системийн газар-агаар ангиллын пуужингийн хэлтэрхийд оногдсон байна" гэсэн юм.

Тухайн онгоц нь аравдугаар сард бүрэн засвар үйлчилгээнд орсон байсан бөгөөд техникийн аливаа гэмтэлгүй байжээ. Бразилд үйлдвэрлэгдсэн "Embraer" онгоц нь аюулгүй байдлын өндөр үзүүлэлтэй.