Үндэсний эрх чөлөө, тусгаар тогтнолоо сэргээн мандуулсны ойг арванхоёрдугаар сарын 29-нд  тэмдэглэн өнгөрүүлдэг. Энэ жилийн хувьд Үндэсний эрх чөлөө, тусгаар тогтнолоо сэргээн сандуулсны 113 жилийн  ой тохиож буй. Энэ өдөр Монголын бурхан шашинтны төв Гандантэгчинлэн хийдээс хэд хэдэн арга хэмжээ зохион байгуулах аж.

Тодруулбал, Богд хааны ордонд VIII Богд Жавзандамба хутагтын сэрэг дүрийн өмнө мандал өргөж, хадаг өргөх аж. Мөн Гандантэгчинлэн хийдэд Арван Богдын Дончид гэх томоохон хурал хурах юм байна. Энэ үеэр Богд Хаант улсын төрийн далбааг мандуулах ажээ.

Монголчуудын сэргэн мандлын эхийг тавьсан 1911 оны Үндэсний эрх чөлөөний хувьсгал нь төрт ёсны эртний уламжлалтай Монголын ард түмний түүхийн онцгой хуудас, хойч үеийн бахархан дурсах түүхт үйл явдал юм. Монголчууд XIII-XIV зуунд дэлхийн түүхийг тодорхойлж байсан хүчирхэг байдлаа алдсан нь хоорондоо зөрчилдөж, хагаран бутарснаас үүдэлтэй. Энэ нь Монгол төрийн баганыг хазайлгаж, Манж чин улсын эрхшээлд ороход хүргэсэн гэж түүхчид үздэг байна.

Монгол Улсын түүхэнд 200 гаруй жил үргэлжилсэн Манж Чин гүрний ноёрхлыг 1911 оны арванхоёрдугаар сарын 29-ний өдөр эцэс болгон, монголчууд үндэсний тусгаар тогтнолоо зарлаж, VIII Богдыг Монгол Улсын шашин төрийг хослон баригч, хэмжээлшгүй эрхт хаанд өргөмжилсөн түүхтэй. Түүнд төрийн тамга, далбаа, өргөмжлөл, хүндэтгэлийг өргөж, таван яам бүхий Засгийн газар байгуулах түүхэн шийдвэр гарган, тусгаар тогтносон Богд хаант Монгол Улсыг байгуулжээ.

УИХ-ын 2007 оны наймдугаар сарын 16-ны өдрийн тогтоолоор 12 сарын 29-ний өдрийг нийтээр тэмдэглэх тэмдэглэлт өдөр болгон зарлаж байв.  Улмаар 2011 оны 12 сарын 23-ны өдрийн тогтоолоор Үндэсний эрх чөлөө, тусгаар тогтнолоо сэргээсний баярын өдөр хэмээн нийтээр тэмдэглэх баярын өдөр болгон хуульчилсан байна.